DILI, 04 outubru 2023 (TATOLI)—Governu liuhosi Konsellu Ministru (KM), kuarta ne’e, aprova ona projetu proposta rezolusaun Parlamentu Nasionál (PN), ne’ebé aprezenta hosi Ministra Finansa, Santina José Rodrigues Viegas Cardoso, ba ratifikasaun no adezaun ba konvensaun internasionál kona-ba sistema armonizadu dezignasaun no kodifikasaun merkadoria.
Antes ne’e, konvensaun internasionál ne’e selebra iha Bruxelas, iha loron 14 juñu 1983, no hetan aseitasaun hosi protokolu emenda ba konvensaun, ne’ebé elabora ona hosi Konsellu Kooperasaun Aduaneira iha loron 24 juñu 1986.
“Konsidera katak konvensaun internasionálne’e adota lista kategoria hosi tarifa sira hanesan iha nível universál, ne’ebé Timor-Leste tuir ona, ho konsiderasaun katak Timor-Leste nu’udár membru Organizasaun Mundiál Alfándega no iha hela prosesu adezaun ba Organizasaun Mundiál Komérsiu inklui Asosiasaun Nasaun Sudeste Aziátiku. Tanba ne’e, integrasaun ba sistema komérsiu internasionál sei hametin ho adezaun ba konvensaun ida-ne’e,” Ministru Prezidénsia Konsellu Ministru, Agio Pereira, hateten hafoin reuniaun ezekutivu, iha Palásiu Governu.
Notísia relevante : Sistema ASYCUDA World ajuda Alfándega iha servisu prosesa dokumentu merkadoria
Sistema armonizadu hanesan nomenklatura internasionál ba klasifikasaun merkadoria ne’ebé dezenvolve hosi Organizasaun Mundiál Alfándega (OMA). Sistema ne’e permite país partisipante bele klasifika merkadoria komersiliazada ho baze komun ba nesesidade lojístika.
Dadaun ne’e sistema ne’e engloba ona grupu merkadoria hamutuk 5.000, identifika ida-idak ho kódigu díjitu neen, ne’ebé organizadu estrutura jurídika, lojístika no fó apoiu ba regra ne’ebé defini ho di’ak hodi bele hetan klasifikasaun ne’ebé hanesan.
Iha biban hanesan, KM delibera ona hodi autoriza konkluzaun negosiasaun kona-ba adezaun Timor-Leste ba Organizasaun Mundiál Komérsiu (OMK) nomós asina akordu sira ne’ebé nesesáriu, iha prosesu ida-ne’ebé sei lidera hosi Xefe Negosiadór ba Adezaun Timor-Leste ba OMK no atuál Vise Primeiru-Ministru, Ministru Koordenadór Asuntu Ekonómiku no Ministru Turizmu no Ambiente, Francisco Kalbuadi Lay, iha loron 07 to’o 11 outubru 2023, iha Jenebra, Suisa.
Jornalista : Antónia Gusmão
Editora : Julia Chatarina
