KADESTO submete proposta ba CSSI apoia nesesidade bázika ba EhD
COVALIMA, 04 outubru 2023 (TATOLI)—Organizasaun Naun Governametál (ONG) Klibur Dezenvolvimentu Sustentavél Timor Oan (KADESTO) submete proposta ba Centro Solidariédade Sosiál no Inkluzaun (CSSI) Covalima atu fó apoia nesesidade bázika ba Ema ho Defisiénsia (EhD) sira iha Covalima.
“Ami submete proposta ba Centro Solidariedade Sosiál no Inkluzasaun Covalima hodi husu apoiu nesesidade bázika ba ema ho defisiénsia sira hodi haforsa ami-nia maluk defisiénsia hodi fó apoia foos,” Diretór ONG KADESTO, Alfredo dos Santos, hateten ba Agência Tatoli iha Tabakolot, kuarta ne’e.
KADESTO submete proposta relasiona situasaun iha terenu defisil tebes, tanba haree ba realidade folin foos sae entaun Ema ho Difisiénsia sira laiha kbiit atu sosa foos.
Ho nune’e, nia hateten, ONG KADESTO hola inisiativa hodi halo diskusaun hodi submete proposta ba CSSI Covalima hodh husu apoiu nesesidade bázika tanba EhD lubuk ida presiza fó apoiu.
ONG KADESTO identifika ema ho difisiénsia iha postu administrativu Maucatar, iha suku Ogues ho Belekasak no iha postu Suai iha suku Beco ne’ebé presiza fó apoia nesesidade bázika ba sira.
Diretór Centro Solidariedade Sosiál no Inkluzasaun Covalima, Agapito Asis Cardoso, hateten nia parte simu ona proposta maibé sei haree mós estoke foos iha armajen atu distibui foos no nesesidade bázika sira seluk ba ema ho defisiénsia (EhD).
“Agora, ha’u sei haree lai estoke foos iha armajen nune’e bele fó apoiu ba sira,” nia dehan.
Eskoke foos iha armajen hamutuk saka 300-resin no sira seluk hanesan koto kilograma 25 hamutuk-49, fore-munggu kilograma 20,49, susu Enak kilograma 45 hamutuk 56, Mie Ayam Sedap iha 112, ikan sardines 49, Biscuit Shong 14, susu Dancow 14, Bimoli 42 no ikan furak liu tuna hamutuk 28.
CSSI Covalima fó apoia foos ba ema ho defisiénsia, Uma Mahon, Fokupers, estudante orfonatu no eis prizoneiru ne’ebé reintegra fali ba nia família.
Tuir dadus, proposta ne’ebé submete ba CSSI Covalima ne’ebé ema ho defisiénsia ne’ebé presiza fó apoiu mai hosi hamutuk 152, ne’ebé mai hosi postu Maucatar hanesan Suku Belekasak nain-48, Ogues na’in-67 no postu Suai iha suku Beco na’in-37.
Jornalista : Celestina Teles
Editór : Cancio Ximenes
