Kareta ICU movél seidauk funsiona tanba rekursu

DILI, 04 outubru 2023 (TATOLI) – Diretór Klíniku iha Hospitál Nasionál Guido Valadares (HNGV) Marcelino Correia, informa kareta ICU movél to’o agora seidauk halo operasaun tanba profisionál saúde ne’ebé atende ba pasiente iha karreta refere mak sei hein rekrutamentu.

Karreta ICU movél to’o agora seidauk utiliza ba kazu krítiku maske uza ba pasiente sira iha sala sirurjiaun mak uza tanba espasu mak la permite.

“Povu Amerikanu ne’ebé apoiu kareta ICU movel ba ita, ne’e ita seidauk utiliza ba kazu krítiku sira, maibé ita uza ba pasiente sira ne’ebé baixa iha sala sirurjiaun ne’ebé nakonu ona, dudu ba ICU movél hodi halo tratamentu ne’eba”, nia dehan ba TATOLI iha nia kna’ar fatin, ohin.

Rekursu ne’ebé menus, nia adianta sei rekruta profisionál saúde atu apoiu servisu iha kareta ICU movél maibé sei hein tan autorizasaun husi Ministériu Saúde.

“Ita mós iha planu atu rekruta tan profisionál saúde sira atu apoiu servisu sira-ne’e iha ICU movél maibé ita hein autorizasaun husi MS, entaun bainhira pasiente barak iha HNGV ita tenke utiliza kareta ICU movél bainhira fatin sirurjiaun nakonu, mak médiku sira muda pasiente sira mai iha kareta ICU refere”, nia salienta.

Nia rekorda, kareta ICU movél nia utilizasaun mak ba kazu sira ne’ebé mak nakonu iha sirurjiaun tanba povu amerikanu apoiu ne’e atu uza ba covid-19 no kazu krítiku sira.

“Kareta ne’e foin daudauk ita utiliza tanba ekipa médika husi Austália nian mai fó tratamentu ba labarik sira ibun sakat tanba fatin sirurjiaun nakonu, entaun labarik sira ne’ebé mak opera ona ibun sakat ita tau ba iha ICU movél hodi bele halo monitorizasaun ne’e di’ak liután maibé profisionál saúde mak ita sei problema hela”, nia afirma.

Nia dehan, funsionamentu ICU Movél só ba pasiente sirurjiaun sira tanba tempu ne’ebé mak presiza los hodi reponde ba ospitál ida-ne’e.

Jornalista : Felicidade Ximenes

Editór : Zezito Silva