HEADLINE, SAÚDE

Pasiente 140 nia moras aumenta tanba passaporte

Pasiente 140 nia moras aumenta tanba passaporte

Marcelino Correia. Imajen/Tatoli

DILI, 04 outubru 2023 (TATOLI) – Diretór Klíniku iha Hospitál Nasionál Guido Valadares (HNGV) Marcelino Correia, hateten pasiente hamutuk 140 nia moras aumenta ona maibé seidauk ba halo tratamentu saúde iha rai liur tanba kaderneta passaporte la iha.

“Ita prepara ona pasiente hamutuk 200, husi ne’e pasiente 60 iha passaporte no balun passaporte mate ita haruka naran ba notariadu tau karimbu hodi prosesa sira ba halo tratamentu saúde iha Indonézia, Malázia, Singapura. Maibé iha pasiente 140 seidauk ba halo tratamentu tanba la iha kaderneta passaporte”, Marcelino Correia, informa ba TATOLI iha nia kna’ar fatin HNGV, ohin.

Tuir nia, pasiente hirak ne’e atu garante sira nia saúde mak médiku sira fó tratamentu tuir saida mak sira bele halo hodi aguenta sira-nia moris.

“Pasiente ne’ebé mak passaporte la iha los mak hamutuk 140, ne’e agora atu garante sira-nia saúde mak médiku sira halo hela tratamentu tuir saida mak sira bele halo hanesan sira bele fó aimoruk hodi tahan, maibé sira-nia moras ne’e mak la’o nafatin ba oin, ezemplu ema kankru presiza atendimentu lalais hodi hetan kemoterapia, se nia la hetan kemoterapia mak moras ne’e  kontinua iha mudansa ba oin”, nia afirma.

Nia hateten, HNGV nia servisu mak prepara moras sira kontinua nafatin diskute ho ekipa junta médiku no espesialista sira hodi haree moras sira ne’ebé mak posibilidade ka tama duni kriteira  hodi halo transferénsia, maibé ba sira ne’ebé mak passaporte la iha mak junta médiku submete pedidiu ba Notariadu Ministériu Justisa atu sira hetan passaporte.

Tanba ne’e, Diretór Klíniku HNGV husu ba Ministériu Justisa atu bele aselera kaderneta passaporte ida-ne’e hodi rezolve problema sira ne’ebé liga ba ema nia saúde.

“Moras sira ne’ebé atu halo transferénsia ba rai liur mak moras fuan, tumor no kankru”, nia konklui.

Jornalista : Felicidade Ximenes

Editór : Zezito Silva

iklan
iklan

Leave a Reply

iklan
error: Content is protected !!