Ekipa MAE fasilita formasaun lalaok eleisaun suku ba PSAS iha Covalima
COVALIMA, 05 Outubru 2023 (TATOLI)—Governu liuhosi Koordenadór Ekipa Formadór Ministériu Administrasaun Estatál (MAE) fasilita formasaun lalaok eleisaun suku ba Pesoál STAE Apoiu Suku (PSAS) iha munisípiu Covalima.
Notísia Relevante: STAE Covalima simu ona urna 444 ba eleisaun suku 2023
“Ami fó formasaun liga ba lei-númeru 9/2016 ho dekretu Governu númeru 14 sai baze fundamentu atu partilla informasaun ba Pesoál STAE Apoiu Suku (PSAS) no aldeia sira, nune’e sira bele garante funsionamentu eleisaun iha sentru votasaun iha aldeia,” Koordenadór Ekipa Formadór Ministériu Administrasaun Estatál (MAE), Castilo de Carvalho, hateten ba jornalista sira, iha salaun STAE, Kampung Baru, kinta ne’e.
Formasaun kona-ba lalaok eleisaun suku ne’e, hala’o durante loron tolu ne’ebé hahú iha loron 05 to’o 06 outubru 2023 fó teória no iha loron 07 outubru halo simulasaun prátika oinsá atu forma meza eleitorál suku no meza eleitorál konsellu suku.
Tuir koordenadór nia observasaun hodi halo avaliasaun hodi hala’o reviu Pesoál STAE Apoiu Suku (PSAS) iha koñesementu di’ak no sira mós responde pergunta ho di’ak nune’e eleisaun suku la’o susesu ho konstribuisaun hosi ema hotu.
Diretór STAE Covalima, Francisco Gusmão, hateten formasaun ba Pesoál STAE Apoiu Suku hahú iha loron 04 outubru kona-ba lalaok eleisaun suku.
“Ita fó formasaun hahú horisehik formasaun ba Pesoál Apoiu Suku, nune’e sira bele apoiu membru meza suku ne’ebé hahú rejistu kandidatura xefe suku iha loron 13 outubru, hahú tuku 10’h00 to’o tuku 13h00,” nia dehan.
Iha formasaun ba Pesoál apoiu ne’e fahe mtéria sira hanesan oinsá atu forma meza eleitorál suku, uza mekanizmu hodi simu lista kandidatura no prosesu kontajen inisiál forma buletin votu suku.
“Mekanizmu forma meza ita uza molok atu tama loron 13 outubru, xefe suku sira públika ona informasaun ba komunidade bele hatene loron atu hala’o eleisaun,” nia dehan.
Atu deside membru asembleia tenke liuhosi enkontru hafoin forma meza eleisaun suku hodi simu aprezentasaun lista kandidatura sira hosi xefe suku ida-idak.
Pesoál STAE ne’ebé tuir formasaun iha STAE mai hosi suku 30 ne’ebé durante halo rekrutadu no sira mak sei fasilita no informasaun ba to’o iha suku no aldeia.
Tuir dadus, STAE Covalima rejista totál eleitór mai hosi postu administrative Fatululik, Fatumea, Fohorem, Fatumea, Tilomar, Maucatar, Zumalai no Suai hamutuk 49,469 ne’ebé ho nia suku 30 aldeia 148.
Jornalista : Celestina Teles
Editór : Cancio Ximenes
