DILI, 05 outubru 2023 (TATOLI) – Prezidente Repúblika José Ramos Horta simu prémiu prestijiozu ‘Doña Maria de las Nieves of Parma’, iha 04 outubru, iha Jeneva, tanba defende pás no independénsia Timor-Leste.
“Prémiu ida-ne’e hanesan rekoñesimentu ba Xefe Estadu nia esforsu ne’ebé la para atu defende pás no independénsia iha Timor-Leste”, tenik liuhosi komunikadu ne’ebé Agência TATOLI asesu hosi media Gabinete Prezidente Repúblika, kinta ne’e.
Prémiu ‘Doña Maria de las Nieves of Parma’ naran hosi Prinseza Marie des Neiges hosi Bourbon-Parma, arístokrata franseza, ornitolojista no ativista Carlist.
“Prémiu ida-ne’e atu hahí individu sira ne’ebé halo kontribuisaun boot ba sira-nia komunidade no mundu tomak, hanesan espíritu servisu no dedikasaun ne’ebé Prinseza Marie des Neiges hatudu”, hateten tan.
Lideransa Ramos Horta nian importante tebes iha viajen Timor-Leste nian ba pás no independénsia.
Jornalista: Hortencio Sanchez
Editór : Zezito Silva
