MNEK-Embaxada Austrália lansa Austrália’s new international development Policy
DILI, 05 outubru 2023 (TATOLI) – Ministru Negósiu Estranjeiru no Kooperasaun (MNEK) Bendito dos Santos Freitas hamutuk ho Enkarregada Negósiu Embaxada Austrália iha Timor-Leste, Caitlin Wilson halo lansamentu ofisiál ba Austrália’s new international development policy Timor-Leste.
“Ha’u hanoin Austrália sai hanesan parseiru importante ida ba Timor-Leste, parseiru ida ne’ebé istóriku tebes, lansamentu ba Austrália’s new international development policy ne’e importante tebes tanba reafirma ita-nia komitmentu ba dezenvolvimentu, mellora liután servisu sira ne’ebé bele apoia dezenvolvimentu internasionál hanesan fatór ba dezenvolvimentu ekónomiku no dezenvolvimentu ba nasaun tomak iha área oioin ne’ebé presiza”, Ministru Bendito dehan liuhosi komunikadu ne’ebé Agência TATOLI asesu, kinta ne’e.
Tanba ne’e, Bendito konsidera lansamentu ba Austrália’s new international development policy importante atu reafirma kompromisu nasaun rua nian ba dezenvolvimentu nasionál.
Nia dehan, Timor-Leste adota polítika externa ne’ebé la iha aliadu no la iha inimigu, so iha de’it amigu ba ema hotu hodi hatudu Timor-Leste nia kompromisu ba pás mak dalan ne’ebé di’ak atu servisu hamutuk ho entidade hotu hodi kontribui ba dezenvolvimentu nasaun.
Iha fatin hanesan, Enkarregada Negósiu Embaxada Austrália iha Timor-Leste Caitlin Wilson, hatete Austrália lansa ona Austrália’s new international development policy iha agustu liubá maibé lansamentu ne’e halo tan iha Timor-Leste tanba importante tebes ba dezenvolvimentu Timor-Leste nian.
“Ami-nia Ministra Negósiu Estranjeiru no Ministru Dezenvolvimentu Internasionál ofisialmente lansa ona polítika ne’e iha fulan agostu liubá, ami mós hakarak halo lansamentu ba polítika ne’e, tanba ida-ne’e importante tebes ba dezenvolvimentu Timor-Leste, polítika ne’e atu fó enfaze ba etapa furak ba etapa furak sira ne’ebé sei mai”, nia dehan.
Nia hatutan, polítika ne’e la’os hanesan dokumentu ne’ebé furak, maibé fó momentu importante ba Austrália hodi servisu besik liután ho parseiru sira ne’ebé importante.
Jornalista: Hortencio Sanchez
Editór : Zezito Silva
