Protesaun Sivíl prepara prevensaun el-nino iha Baucau
BAUCAU, 05 outubru 2023 (TATOLI) – Serbisu Munisipál Protesaun Sivíl no Dezastre Naturál kontinua halo preparasaun hodi prevene risku el-nino bainhira akontese iha Baucau.
Diretór Serbisu Munisipál Protesaun Sivil no Dezastre Naturál, Nelson Abílio Soares Nunes, esplika, liuhosi sorumutu hanesan parte kria komisaun ba preparasaun hodi komemora loron internasionál redusaun risku dezastre no buka solusaun hodi halo intervensaun risku ba el-nino bainhira akontese iha futuru.
“Ita enkontru atu halo preparasaun bainhira akontese bailoro naruk, ne’ebé afeta ba komunidade hanesan hamlaha, bee maran no inséndiu,” Diretór Protesaun Sivil no Dezastre Naturál Baucau hateten iha Vila Nova, kinta ne’e.
Objeitivu hosi inkontru refere atu fahe informasaun no soe idea hamutuk hanesan atividade hodi komemora loron internasionál redusaun risku dezastre naturál ne’ebé tuir planu sei selebra iha loron-13 outubru.
Tuir planu, liuhosi komemorasaun loron mundiál risku dezastre sei halo atividade importante hanesan divulgasaun informasaun ba komunidade sira ligadu ho jestaun dezastre no planu estratéjia hodi prevene bainhira akontese el-nino iha Baucau.
“Ita ko’alia oinsá komisaun halo bainhira akontese el-nino hanesan estoke hahan no mobilizasaun transporte liuhosi apoia parseiru dezenvolvimentu no governu,” Nelson Nunes akresenta.
Governu liuhosi Sekretaria Estadu Protesaun Sivíl alerta ona kona-ba prosesu prevene el-nino nune’e munisípiu kontinua halo preparasaun tékniku hodi hasoru situasaun ne’ebé tuir prediksaun sei akontese iha Timor-Leste.
Partisipa iha enkontru preparasaun loron internasionál redusaun risku dezastre, komposta hosi Polísia Nasionál Timor-Leste (PNTL), Organizasaun Naun Governamental (NGO), Jestór Administrasaun Munisipál no Autoridade Protesaun Sivíl Baucau.
Jornalista : Natalino Belo
Editór : Evaristo Soares Martins
