DILI, 05 outubru 2023 (TATOLI) – Koordenadór Primeiru Kominsaun Rekrutamentu F-FDTL tinan 2023 Nuno Carvalho dos Santos, anunsia katak rekrutamentu ba membru foun Falintil-Forsa Defeza Timor-Leste (F-FDTL), ho rejime espesiál hamutuk 87, rekrutamentu hahú iha ohin, 5 to’o 20 outubru.
Rekrutamentu ne’e ho baze ba despaixu Ministru Defeza no Komandu F-FDTL ne’ebé sai iha loron 2 outubru 2023, hodi orienta komisaun rekrutamentu atu loke ba públiku kona-ba prosesu no rekezitu rekrutamentu ba membru F-FDTL foun ba ema ho nivél akadémiku lisensiatura no masteradu hamutuk nain-87 iha tinan ne’e.
“Rekrutamentu tinan ida-ne’e ami loke vaga hamutuk 87 no vaga ne’e ami fó prioridade liubá sira ne’ebé ho nivél edukasaun S1, S2 no mós ami la taka dalan ba nivél edukasaun aas liu, karik iha interese atu tama iha filleira forsa armada. Rekrutamentu ne’e komesa ohin loron 5 outubru to’o loron 20 outubru 2023”, Nuno Carvalho dehan liuhosi konferénsia imprensa ne’ebé hala’o iha Kuartel Jenerál F-FDTL, kinta ne’e.
Nia dehan, rekrutamentu ba membru F-FDTL foun, sidadaun sira sei aplika liuhosi sistema aplikasun online iha website htpps:// rekrutamentu:f-fdtl.tl.
“Ita halo prosesu rekrutamentu ho sistema online, ida-ne’e atu evita buat bolu la tranparánsia”, nia informa.
Nuno esplika, hosi prosesu rekrutamentu, kada aplikante sira sei iha númeru identifikasaun atu fasilita sira bele akompaña rekrutamentu hahú hosi faze selesaun dokumentu to’o rezultadu final.
Tuir nia, sistema online, aplikante rejistu nia-naran no nia mak sei simu númeru identifikasaun tanba nia mak sei akompaña prosesu ne’e to’o remata.
Nia dehan, komisaun taka sai ona kritéiru sira ba rekrutamentu kadetes foun membru F-FDTL iha Sede Suku Becora, Comoro no suku sira iha Díli laran, inklui komisaun anunsia ona vaga refere liuhosi Plataforma média.
Kritéiriu ba rekrutamentu
Kritériu sira ba rekrutamentu mak aplikante sira tenke aprezenta dokumentu komprovativu ba komisaun, hanesan sertifikadu iha nivél akadémiku, krikulum vitae, kartaun identifikasaun (BI, eleitorál) no anexa kartaun sira seluk ho format PDF no GPG.
Aplikante sira ne’ebé hakarak konkore tenke ho idade 35 mai kraik ho esperiénsia servisu ho tinan rua. Aplikante sir abele aplika iha oras 8:30 to’o 4:30 loraik. Maibé karik iha konfuzaun ba prosesu aplikasaun, bele konsulta ba komisaun durante oras atendimentu, liuhosif númeru telefone 76415537 no 77965368.
Hafoin komisaun simu dokumentu hosi aplikante sira, komisaun sei halo verifikasaun dokumentu, teste saúde, teste fíziku no entrevista. Maibé iha selesaun de’it mak la priénse ona rekezitu automatikamente la liu tanba siste ne’ebé transparante, la iha rekomendasaun ruma hosi ema seluk.
Jornalista: Natalino Costa
Editór : Zezito Silva
