DILI, 05 outubru 2023 (TATOLI)–Sekretáriu Estadu Asuntu Toponímia no Organizasaun Urbana (SEATOU), Germano Santa Brites Dias, halo sensibilizasaun ba implementasaun dekretu-lei 33/2008 kona-ba ijiene no orden públiku ba komunidade Manatuto.
“Vizita ohin ne’e, atu fahe informasaun para servisu iha kraik bele la’o liuliu toponímia nian, atu haree liubá dekretu-lei númeru 33/2008 kona-ba ijiéne orden públika. Tanba ne’e, mak hosi ne’e ba oin servisu tenke la’o daudauk ona, nune’e depois hodi hadi’a netik sidade Manatuto no ita bele sente ninia orijinalidade ida uluk ne’e,” Germano Santa Brites Dias hateten liuhosi nota ne’ebé Agência Tatoli asesu, kinta ne’e.
Objetivu hosi sensibilizasaun ne’e atu fó hanoin nafatin ba komunidade kona-ba oinsá kuidadu lixu no ambiente iha tempu udan no fó esplikasaun kona-ba dekretu-lei númeru 33/2008, 27 agostu, ne’ebé mak bandu negosiante sira labele faan sasán iha espasu públiku liuliu iha munisípiu Manatuto.
Nia hateten, administradór munisípiu Manatuto ho ninia rekursu sira prontu no preparadu para bele fahe informasaun ba kraik, liuliu ba negosiante no mós maluk sira-ne’ebé haki’ak animal inklui Polísia Nasionál Timor-Leste (PNTL) prontu asegura munisípiu nia servisu iha terrenu, tanba servisu ne’e servisu ekipa la’ós servisu mesak.
“Ha’u fiar katak ho enkontru ida ohin, Manatuto-oan sira prontu para atu bele fó susesu ba iha programa no planu toponímia nian para bele hadi’a sidade Manatuto,” nia dehan.
Administradór Munisipiu Manatuto, Bernardo Lopes, apresia tebes ba vizita dahuluk hosi SEATOU nian iha Manatuto, hodi halo sensibilizasaun ba dekretu-lei refere.
“Ohin, primeira vizita ne’e ami hakarak agradese ba sua exelénsia ho ekipa tomak, atu bele mai hamutuk ho ami no bele fahe informasaun no orientasaun ba ami, oinsá mak ba oin ami atu hakat,” nia dehan.
Biban ne’e marka mós prezensa hosi Komandante PNTL Munisípiu Manatuto, kargu xefia hosi lina Ministeriál, autoridade lokál no mós lider komunitária sira.
Jornalista : Osória Marques
Editór : Cancio Ximenes
