Serbisu Sosiál reajusta dadus benefisiáriu bolsa da mãe iha Baucau
BAUCAU, 05 outubru 2023 (TATOLI) – Serbisu Munisipál Solidariedade Sosiál Baucau durante loron-sanulu hala’o reajustamentu dadus ba benefisiáriu bolsa da mãe kondisionál iha munisípiu Baucau.
Diretór Serbisu Solidaridade Sosiál Baucau, Clementino Sarmento, esplika, prosesu reajustamentu dadus refere hala’o tanba atu hatene benefisiáriu bolsa da mãe iha munisípiu Baucau ne’ebé hala’o durante loron-10 iha kada postu no suku sira.
“Ekipa sira ba terrenu tama-sai uma hodi foti dadus hodi halo reajustamentu ba benefisiáriu sira iha Baucau,” Diretór Serbisu Munisipál Solidaridade Sosiál Baucau informa ba Agência TATOLI iha Vila Nova, kinta ne’e.
Razaun halo reajustamentu dadus tanba benefisiáriu sira hosi tinan-2012 to’o 2023 maioria idade liu ona tinan-17 maibé sei ativu iha baze dadus inklui benefisiáriu balun la eskola ona sein iha justifikasaun.
Alende ne’e, komunidade vuneravél balun nia oan prienxe ona kritéria hanesan idade no nu’udar estudante maibé seidauk rejistu no ladauk hetan subsídiu refere.
Atividade rekolla dadus refere hahu iha loron-22 to’o loron-30 setembru ho durasaun loron-sanulu inklui loron haat seluk utiliza ba entry dadus no halo relatóriu hodi submete ba nasionál antes halo pagamentu ba benefisiáriu sira iha fulan-dezembru tinan-ne’e.
Clementino Sarmento, argumenta, ekipa rekolla dadus hasoru difikuldade iha terrenu tanba komunidade barak seidauk partisipa másimu no menus dokumentu nune’e tuir planu sei kontinua hikas atividade hanesan antes tinan-2024.
Kritéria atu prienxe tenke maihosi família vulnerável, kompleta dokumentu hanesan visa família, kartaun Billete Identidade hosi benefisiáriu no inan-aman, sertidaun RDTL inklui kaderneta eskola no idade másimu tinan-17.
Governu liuhosi Ministériu Solidaridade Sosiál no Inkluzaun (MSSI) sei hala’o pagamentu ba benefisiáriu bolsa da mãe kada tinan dala-ida.
Jornalista : Natalino Belo
Editór : Evaristo Soares Martins
