Vise-ministru infraestrutura observa direta kompañia Karisan Bonamsa ateru estrada Lokeu
COVALIMA, 05 Outubru 2023 (TATOLI)—Vise-Ministru Infraestrutura, Júlio do Carmo, hamutuk ho diretór obra públika munisípiu Covalima, Alberto Cardoso, observa direta progresu servisu hosi kompañia Bonamsa hala’o manutensaun períodika hodi ateru rai ba estrada kolimetru neen (6) iha parte Lokeu, suku Ogues, Maucatar, Covalima.
“Ha’u mai atu haree direta projetu ne’ebé la’o hela, nia servisu la’o oinsá ona no bainhira mak atu finaliza. Sira halo servisu tuir dezeñu ka Planta no Kadernu em Kargu (BoQ=Bill of Quantity) ka lae,” Governante ne’e hateten ba jornalista sira iha Lokeu, kinta ne’e
Hafoin observa iha terrenu, tuir nia, observasaun ba progresu servisu ne’ebé kompañia Bonamsa halo manutensaun períodika estrada dirarasaun iha parteLokeu, postu administrativu Maucatar, munisípiu Covalima la’o di’ak maibé kompañia tenke troka rai-mutin ne’ebé halo ateru estrada.
Razaun, Governante ne’e sujere ba kompañia atu troka rai-mutin ne’ebé mak kompañia ateru ba estarada ne’e, tanba rai-mutin refere fatuk barak no halo estrada ladún kabeer
Ho nune’e, kompañia tenke kumpre no bainhira la kumpre mak Governu sei dudu hasai rai-mutin hirak ne’e, tanba kompañia hala’o servisu tenke tuir regra kompañia ateru rai tenke liuhosi laboratóriu.
Diretora Kompañia Karisan Bonamsa, Lidia José de Araújo Nunes, esplika kompañia hahú hala’o servisu iha fulan novembru 2022 halo kultura no kontinua servisu, nune’e iha fulan outubru nia rohan ne’e bele finaliza ona halo manutensaun períodika hodi ateru rai.
Nain ba kompañia ne’e hatán kona-ba rekomendasaun hosi Vise Ministru Infraestrutura atu troka fali ne’ebé kompañia halo ateru, maibé kompañia foti de’it rai-isin hodi taka fali no lori silindru sei sama-hanehan para metin.
Kompañia uza rai-mutin hodi ateru estrada hosi Obra públika Covalima, haree rai ne’ebé ateru tuir kritéria tanba bainhira tempu udan ne’e, rai-mutin la hamosu tahu.
Tuir dadus, traballadór ne’ebé servisu iha kompañia Karisan Bonamsa hodi hadi’a estrada bainhira karreta butuk rai hamutuk 33 kompostu hosi feto 20 no mane hamutuk 13.
Jornalista : Celestina Teles
Editór : Cancio Ximenes
