Área Bubur-laran no Weluli Manas Viqueque asesu ona eletrisidade
VIQUEQUE, 06 outubru 2023 (TATOLI)—Prezidente Konsellu Administrasaun Eletricidade de Timor-Leste, Empreza Públika (EDTL, E.P), Paulo da Silva, hamutuk ho autoridade, sesta ne’e, inaugura projetu eletrifikasaun iha área Bubur-laran no sítiu turístiku Weluli Manas, Viqueque.
Prezidente EDTL, E.P, hateten, eletrisidade sai save setór ekonómiku, tanba ne’e Governu ne’ebé ukun iha obrigasaun asegura ahi eletrisidade ba povu, nune’e eletrifikasaun ba suku 36 iha munisípiu Viqueque konklui ona.
“VIII Governu uluk tau prioridade ba ahi eletrisidade, nune’e IX Governu mós sei kontinua oinsá maka ita lori lalais ahi ba povu. Iha biban ne’e, ha’u hakarak hato’o parabéns ba abitante sira iha área Bubur-laran, kompostu hosi Loihunu no Uaimori tanba abitante sira kuaze tinan barak la asesu ahi eletrisidade no agora maka foin asesu,” Paulo da Silva, dehan ba Agência Tatoli, hafoin ramata inaugurasaun projetu eletrifikasaun, iha área Bubur-laran, sesta ne’e.
Notísia relevante : Viqueque benefisia projetu dada eletrifikasaun neen
Projetu eletrifikasaun iha área Bubur-laran, iha uma-kain tolu maka seidauk asesu ba ahi eletrisidade.
“Ami sei kontinua tau atensaun hodi abitante sira bele asesu hotu. Aleinde ne’e, ha’u husu ba abitante sira tenke uza enerjia ho di’ak, bainhira la uza, tenke taka atu nune’e bele poupa enerjia,” nia fó hanoin.
Iha fatin hanesan, Administradór munisípiu Viqueque, Januário Soares ‘Bolly’, haktuir, abitante sira durante ne’e depedénsia ba lamparina no lilin desde Timor-Leste ukun rasik-an, maibé agora sira hetan ona naroman, nune’e bele uza ba nesidade ne’ebé importante no estudante sira bele uza iha tempu kalan ba estuda.
“Ha’u hanoin daudaun ahi lakan ona ne’e sai hanesan oportunidade ba abitante sira halo atividade ekonomia no serbisu sira seluk,” nia akresenta.
Nune’e mós, Xefe suku Uaimori, Francelino A. Gomes, agradese ba Governu tanba liuhosi EDTL, E.P no empreza responsável, abitante sira bele asesu ona ahi eletrisidade.
“Ha’u reprezenta suku rua no abitante sira iha parte Bubur-laran, hakarak agradese ba EDTL, E.P no empreza responsável ne’ebé konsege finaliza ona projetu ne’e durante fulan-tolu. Ida-ne’e ami foin sente katak ukun rasik-an tanba tinan barak nia laran ami moris iha nakukun nia laran,” nia tenik.
Projetu eletrifikasaun sei benefisia ba
abitante hosi Cararas, Weluli Manas no Bubur-laran kompostu hosi aldeia Meauai no Uatulesu iha suku Uaimori, postu Viqueque Vila no aldeia Uaieda no Sama iha suku Luihunu, postu Ossu ho totál uma-kain 151.
Projetu instalasaun liña media tensaun kilómetru neen resin (MT 6,2 KMS) no liña baixa tensaun kilómetru tolu resin (BT 3,75 KMS), trasformadór no instalasaun baixada ba uma komunidade.
Projetu eletrifikasaun ne’e implementa hosi emprenza Tula Eli Unip, Lda JV Waida Unip, Lda, ho durasaun kontratu fulan-neen ho kustu $361.791,48.
Tuir observasaun Agência Tatoli, I.P iha terrenu, nota katak durante serimónia inaugurasaun projetu abitante sira espresa sentimentu kontente no bainhira Prezidente EDTL, E.P loke ahi eletrisidade, sira tebe no dahur besik ai-rin eletrisidade.
Serimónia ne’e hetan partisipasaun hosi Administradór postu Ossu, Komandante Polísia Nasionál Timor-Leste (PNTL) Eskuadra Ossu inklui komunidade lokál.
Jornalista : Vitorino Lopes da Costa
Editora : Julia Chatarina
