Deputadu PD husu MAPPF presiza regula vendedór faan naan
DILI, 06 outubru 2023 (TATOLI)—Deputadu hosi bankada PD iha Parlamentu Nasionál (PN), Alexandrino Nunes, husu Ministériu Agrikultura, Pekuária, Peska no Floresta (MAPPF) liuhosi Sekretária Estadu Pekuária atu regula didi’ak vendedór faan naan iha rai-laran.
“Ha’u iha preokupasaun ida liuliu situasaun atuál liuliu ita-nia vendedór faan naan sira. Bazeia ba observasaun kuaze iha Dili laran no munisípiu sira, ita-nia vendedór sira faan naan arbiru de’it, ita tenke tau atensaun produtu rai-laran. Atu rekomenda ba MAPPF liuliu Sekretária Estadu Pekuária ka dirasaun pekuária atu toma atensaun,” Deputadu PD ne’e hateten iha uma fukun PN.
Atuál segundu Vise Prezidente PN ne’e dehan, tanba hanesan ne’e TL iha problema bainhira la regula didi’ak animál produtivu sira-ne’e sei oho hotu.
Nia hateten, naan hirak ne’e ne’e mós dala ruma mosu iha merkadu mai mistura tiha ona liuliu naan karau ho naan kuda kahor malu ona, ida ne’e problema tanba TL laiha meiu la tuir padraun.
“Ne’ebé, atu fó hanoin ba dirasaun pekuária atu bele haree ho didi’ak. Tanba, se tuir padraun pekuária ne’e ita pesoál saúde sei atensaun liuliu atu hatene karau ka fahi ne’ebé oho kona moras ka lae,” nia hateten.
Dala barak, tuir nia, naan sira mosu iha merkadu mós naan sira-ne’ebé mai hosi animal sira-ne’ebé moras hela mak sira faan nia faan.
Depois, nia dehan, karau no fahi sira-ne’ebé inan sei produtivu hela labele oho, maibé dalabarak tanba ema na’in ne’e presiza osan entaun tenke oho no ida-ne’e hakotu ona animál ne’ebé mak atu prodús tan iha loron aban.
“Sujere, pelumenus iha munisípiu hotu-hotu tenke harii ona matadoru TPC modernu hodi haree kestaun ne’e, hodi liga ho ema konsumu ne’e tenke konsumu ho naan ne’ebé kualidade,” Deputadu hosi bankada Governu ne’e hateten
Jornalista : Nelson de Sousa
Editór : Cancio Ximenes
