BAUCAU, 06 outubru 2023 (TATOLI) – Governu liuhosi Ministériu Komérsiu no Indústria sei dezenvolve zona komérsiu libre iha área fronteira entre Timor-Leste ho Indonézia.
Ministru Komersiu no Indústria, Filipus Nino Perreira, esplika, polítika estadu liuhosi Prezidente Repúblika no Primeiru Ministru hahú ona negosiasaun hodi determina fronteira ho Indonézia nune’e governu hahú prepra planu atu promove ekonomia iha área fronteira liuhosi asaun konkreta zona komérsiu livre.
“Zona komérsiu livre bele hatuur atu asegura ita-nia interese polítika, ekonomia, sosiál no kulturál inklui seguransa,” Ministru Komérsiu no Industria hateten ihha Vila Antiga, sesta ne’e.
Implementasaun zona komérsiu liblvre ne’e sei hahú ho fazeadamente hanesan estudu viabilidade liuhosi Orsamentu Jerál Estadu (OJE) tinan-2024, prepara lejizlasaun, hadi’a infraestrutura no preparasaun rekursu umanu iha área fronteira nune’e bele koopera no kontribui liuliu setór privadu sira.
Governante ne’e, argurmenta, presiza zona komersiál tanba atu asegura no kontrolu soberania nasaun tanba bainhira ekonomia no polítika estavel bele redús ona ameasa prátika tráfiku umanu, droga, movimentasaun ema no sasan tama-sai iha área fronteira.
Tuir planu, governu sei kria polítika atu fó prioridade ba produtu rai-laran mesmu rekoñese seidauk kobre nesesidade rai-laran hanesan haree, masin, kafé, na’an no seluk tan ne’ebé Timor-Leste iha poténsia atu dezenvolve mesmu to’o ohin-loron sei kontinua inporta hosi rai-liur.
Governu sei esforsu atu promove no kontinua espande merkadu internasionál liuhosi adezaun ba ASEAN ho estabelesemente merkadu livre iha Timor-Leste ho fasilitadade dijitalizasaun komérsiu hodi mobiliza produtu.
Jornalista : Natalino Belo
Editór : Evaristo Soares Martins
