Konstrusaun parke indústria sei hahú iha 2024
BAUCAU, 06 outubru 2023 (TATOLI) – Governu liuhosi Ministériu Komérsiu Indústria (MKI) planeia sei hahu konstrusaun projeitu parke indústria iha suku Ulmera no Vatuvou, postu admistrativu Bazartete no Maubara, munisípiu Liquiçá iha tinan 2024.
Ministru Komersiu no Indústria, Filipus Nino Perreira, esplika, projetu refere finaliza ona estudu viabilidade no kontinua ona halo indemnizasaun ba komunidade ne’ebé afetadu no iha ona faze dezeñu.
“Iha tinan-2024, ita hanoin ona atu haree ninia konstrusaun ne’ebé hato’o planu prioridade ba iha Ministériu Planeamentu Investimentu Estratejiku (MPIE),” Ministru Komérsiu Indústria hateten iha Vila Antiga, sesta ne’e.
Tuir planu fatin ba investementu parke indústria sei konstrui faze dahuluk ektare 50 iha área Ulmera hosi total ektare 950 tanba tuir estudu besik portu Tibar ne’ebé fo vantajen multiplika ekonomia nune’e bainhira remata diskute ho MPIE sei haklean liután iha komité revizaun orsamentu.
“Hahú uluk ho ektare 50 depois ita sei aumenta tán purvolta ektare atus sia, rai iha tiha ona” Nino Perreira akresenta.
Governante ne’e, informa, liuhosi sorumutu ho estrutura Kámara Komérsiu Indústria Timor-Leste (CCI-TL, sigla portugés) Munisípiu Baucau atu hahú prepara aan no partisipa iha planu investimentu refere nune’e bele ajuda dezenvolvementu ekonomia iha Timor-Leste.
Governu konsidera, CCI-TL nu’udar parseiru inportante iha pilar dezenvolvementu ekonomia nune’e presija politika komunikasaun ne’ebé presija reforsa liuliu setór privadu sira hotu hodi apoia governu hadia ekonomia.
Timor-Leste iha setór tolu importante atu hadia ekonomia hanesan publiku, privadu no kooperativa nune’e presiza kontinua promove, komunika no rona dezafiu hotu ne’ebé durante ne’e infrenta liuliu iha parte lejislasaun sira.
Governu tenke iha polítika klaru nune’e fo apoia liuhosi produs lejislasaun sira, fasilita aktividade komerisiál inklui kria kondisaun infraestrutura ne’ebé adekuadu nune’e fo oportunidade hanesan ba setór privadu sira.
“Informasaun sira-ne’e ita kontinua kanaliza ba sira atu hola parte ativu liu tan nune’e halo investimentu iha zona komérsiu livre no parke industrial,” Nino Perreira informa.
Projetu refere halao estudu viabilidade liuhosi kompaña Haberan hamutuk ho Institutu Teknolojia Surabaya (ITS) Indonézia ne’ebé hetan kontratu hosi XIII governu konstitusionál iha fulan-janeiru tinan-2022.
Jornalista : Natalino Belo
Editór : Evaristo Soares Martins
