DILI, 06 outubru 2023 (TATOLI)—Ministru Agrikultura, Pekuária, Peska no Floresta, Marcos da Cruz, enkoraja emprezáriu lokál atu halo investimentu iha área peska.
“Ikan iha ita-nia tasi laran barak tebes maibé ita seidauk iha empreza lokál ruma ne’ebé halo pedidu hodi husu lisensa kaer ikan iha tasi-laran laran,” Ministru Marcos hateten baihira partisipa serimónia entrega prémiu ba manán-na’in sira iha Kompetisaun Planu Negósiu Inovativu 2023, ne’ebé realiza hosi Institutu Apoia Dezenvolvimentu Emprezariál (IADE), iha Timor Plaza, kinta (05/10).
Notísia relevante : Governu sei distribui bero fiberglass ba peskadór sira iha Viqueque
IADE realiza kompetisaun planu negósiu inovativu tinan ne’e foka liu ba pekuária, nune’e Ministru husu tinan tuir mai bele realiza eventu hanesan iha setór seluk hanesan peska no área produtivu seluk, tanba investimentu iha área sira ne’e mínimu tebes.
“Ita-nia problema daudaun maka má nutrisaun, iha tempu sira antes ne’e inan-aman sira hakiak karau Timor no sira prodús karau susu-been, ne’ebé karik iha joven balun iha inisiativa hakiak karau hodi halo produsaun ba karau nia susu-been, karik iha, hala’o ba mak Governu haree oinsá hodi apoia,” nia akresenta.
Governante ne’e dehan, papel Governu maka atu fasilita no fó apoia téknika ba populasaun ne’ebé iha vontade no inisiativa di’ak hodi kria negósiu ba an rasik no ba ema seluk.
“Saida de’it mak povu hakarak, Governu buka fasilita atu nune’e bele la’o ba oin hodi hetan ita-nia hakarak ne’ebé ita mehi, katak ema hotu tenke hetan moris di’ak, signifika ekonomia tenke di’ak,” nia tenik.
Governante ne’e husu ba IADE atu kontinua kapasita timor-oan sira halo negósiu, liu-liu iha setór agrikultura, pekuária no peska.
“Tanba rai iha parte súl nian barak mak abandona, tanba ne’e iha joven balun hakarak investe iha área sira ne’e bele hanoin ona oinsá atu utiliza rai sira ne’e hodi halo negósiu,” nia enkoraja.
Jornalista : Antónia Gusmão
Editora : Julia Chatarina
