OÉ-CUSSE 06 outubru 2023 (TATOLI – Motorista sira iha Rejiaun Administrativa Espesiál Oé-Cusse Ambeno (RAEOA), preokupa tanba durante ne’e Governu fasilita karta kondusaun ho provizória de’it no bainhira utiliza iha kapitál Díli la vale.
Motorista Hermenegildo Abi, nu’udar kondutór mikrolete, husu Governu liuliu autoridade RAEOA, atu bele fasilita hodi asesu karta kondusaun orijinál.
“Ha’u-nia karta kondusaun ne’e halo iha 2022 maibé provizória de’it, orijinál laiha, durante ami lori karreta uza provizória de’it, maibé ida-ne’e vale ba O’e-Cusse, bainhira atu ba Díli la vale ida,” Hermenegildo Abi, hateten iha Oé-Cusse, sesta ne’e.
Nune’e mós Ramos Colo nu’udar kondutór, informa, karta kondusaun la’ós ba karreta de’it maibé inklui motorizada sira.
Tuir nia, dalaruma durasaun ba karta kondusaun ne’e tinan ida ka tinan rua de’it, tan ne’e sira husu ba Governu liu-liu Autoridade RAEOA, atu fasilita dokumentu sira ba transporte liu-liu karta kondusaun ba orijinál.
“Karta kondusaun ne’e desde uluk to’o agora laiha mudánsa provizória de’it, bainhira ami tun iha Dili karik, karta kondusaun ne’ebé halo iha Oé-Cusse la vale, polísia kuandu prende les tiha, tanba surat-tahan de’it la’os orijinál hanesan kartaun eleitorál ne’e, maib’e halo iha surat-tahan de’it,” nia katak.
Hatán ba preokupasaun ne’e, Xefe Departamentu Transporte Terrestre Rejiaun Oé-Cusse Ambeno, Silvestre Sila Teme, hateten, difikuldade ne’ebé infrenta, maka dokumentu transporte no karta kondusaun daudaun ne’e sei fasilíta ho provizória, maibé DRTT encamiña ona proposta ba iha Gabinete Prezidente Prezidente Autoridade hodi ajenda iha planu Asaun Anuál.
“Ne’e akontese ona iha Dili, ha’u hato’o ona ba Prezidente Autoridade RAEOA, no husu tuir ba polísia tranzitu nasionál, persiza konfirma ho DNTT, maibé ita diferenti uitoan tau logu ZEESM iha karta kondusaun ne’e,” nia katak.
Tuir nia, maske karta kondusaun ne’e provizória, maibé ne’e desizaun autoridade tanba iha kompeténsia tuir lei númeru 3/2014, iha kompeténsia atu kria saida de’it iha Oé-Cusse, importante iha karimbu no asinatura.
“Sekarik prende kuandu la vale, tuir loloos husu tuir autoridade, kuandu les, labele tanba ema mai trata selu taxa, kontribui reseita ba kofre Estadu, maske provizória hanesan ne’e maibé iha karimbu transporte,” nia klarifika.
Nune’e mós molok hetan karta kondusaun ne’e motorista sira liuhosi prosesu priénse kritéria, primeiru tuir ezame rambu-rambu s’e nia liu mak foin hetan maibé ba selu direita iha banku maka foin bele asesu karta kondusaun ne’e.
“Maibé preokupasaun ne’e ita tau iha planu asaun tinan oin, tanba problema ne’ebé ami hasoru primeiru dokumentu transporte sei provizória tanba seidauk iha mákina imprime ba originál, daruak kona-bá instalasaun no karta kondusaun ita uza de’it provizória tanba blanko originál iha ona maibé persiza fotografia, entaun 2024 ita bele produs ona orijinál,” nia promete.
Jornalista: Abílio Elo Nini
Editór: Evaristo Soares Martins
