DILI, 23 Maiu 2026 (TATOLI) – Asistente Adidu Traballu Timor-Leste iha Repúblika Korea, José Sebastião Coli Soares, informa, traballadór Timoroan ida ho naran Julião Assunção da Silva ne’ebé hetan asidente iha iha Incheon, Korea, simu ona tratamentu husi médiku no konfirma ninia kondisaun agora di’ak ona.
Asistente Adidu traballadór ne’e haktuir tan katak asidente refere akontese iha loron 22 fulan-Maiu 2026, besik tuku 22:00 kalan no parte autoridade traballista Timor-Leste imediatamente halo kedas kontaktu ho empregadór kompania peska Geum Young-ho hodi husu informasaun detallada kona-ba situasaun traballadór referidu.
“Ami simu informasaun kona-ba asidente refere no imediatamente halo kontaktu ho empregadór atu husu informasaun detalladu kona-ba kondisaun traballadór ne’e,” adidu traballadór ne’e relata ba Agência TATOLI iha telefone, ohin.
Nia esplika katak aleinde ne’e empregadór mós halo koordinasaun ho kapitaun ró nian atu lori fila fali traballadór ne’e mai rai-maran hodi hetan atendimentu médiku ho lalais.
“Hafoin halo ezaminasaun médika, ospital konfirma katak kondisaun saúde traballadór refere di’ak hela no simu de’it ai-moruk atu konsumu durante períodu rekoperasaun nian”, nia informa.
Enkuantu tuir kronolojia ne’ebé parte autoridade ko’alia diretamente ho traballadór iha dadeer ne’e, nia hateten katak tali ida ne’ebé liga ba nia koskoleta iha parte knotak monu derrepente mak halo nia monu ba tasi-laran no desmaia.
Jornalista: Alexandra da Costa
Editór: Rafael Ximenes de A. Belo
