Timor-Leste adere ba OMK iha 2024
BAUCAU, 06 outubru 2023 (TATOLI) – Prosesu adezaun Timor-Leste ba Organizasaun Mundiál Komersiu (OMK) sei akontese iha inísiu tinan-2024.
Ministru Komérsiu no Indústria, Filipus Nino Perreira, esplika, atuál Timor-Leste iha ona faze ikus prosesu finalizasaun ba membru plenu OMK nian nune’e governu liuhosi Ministériu Koordenadór Asuntu Ekonómiku sei tuir enkontru ikus grupu traballu iha Jenewa, Swiza loron-11 fulan ne’e.
“Iha fevereiru tinan-2024 ita finaliza ona prosesu ne’e no ita sai ona membru permantente ba OMK nian,” Ministru Komérsiu no Indústria hateten hafoin enkontru ho estrutura CCI-TL Baucau iha Vila Antiga, sesta ne’e.
Governante ne’e, argumenta, mesmu iha sosiedade balun hanesan Kámara Komérsiu Indústria Timor-Leste (CCI-TL, sigla portugés) kestiona kona-ba preparasaun maibé prosesu kontinua la’o tanba Timor-Leste parte hosi integrante komersiál mundiál iha obrigasaun tenke adere ba organizasaun mundiál refere.
“Prosesu ne’e la’ós loron-ida ba rua, hahu kedas 2006 no tinan-2024 ita sei hakotu ba membru permanente,” Nino Perreira akresenta.
Prezidente CCI-TL munisípiu Baucau, José Januário dos Reis ‘Noki’, kestiona ho benefísiu hosi adezaun Timor-Leste ba membru permanente OMK tanba governu presiza kria uluk kondisaun inklui fasilita emprezáriu sira nune’e prontu banhira nakloke ba mundu.
“Hau-nia hanoin adezaun ba OMK ne’e importante maibé la’ós urjénsia,” Noki hateten.
OMK nu’udar organizasaun mundiál ne’ebé regula atividade hotu kona-ba komérsiu internasionál nian, harii iha tinan-1995 ho objetivu hodi fó akordu axullia ba sasán, importadór no esportadór hosi kada nasaun hodi dezempeña sira-nia atividade komérsiu tuir regra internasionál atu garante seguru no transparánsia.
Jornalista : Natalino Belo
Editór : Evaristo Soares Martins
