DILI, 08 outubru 2023 (TATOLI)– Sekretaria Estadu ba Igualdade (SEI), liuhosi Diresaun Nasionál Dezenvolvimentu Jéneru (DNDJ) , Departamentu Empoderamentu Ekonomia no Partisipasaun Feto iha Politika kapasita formasaun kona-ba oinsá atu sai lideransa komunitária ida-ne’ebé di’ak bainhira eleitu xefe suku.
“Formasaun ne’e atu bele fasilita sira-nia kampaña eleitorál ko’alia iha públiku no sira iha ona koñesimentu kona-ba jestaun lideransa bainhira sira eleitu iha ona koñesementu natoon atubele halo planu no jestaun ba iha dezenvolvimentu suku,” Diretór Nasionál Dezenvolvimentu Jéneru, José do Rosário Carvalho informa liuhosi komunikadu imprensa asesu, domingu ne’e.
Nia hateten, atu asegura partisipasaun feto iha lideransa komunitáriu ekipa tékniku fó formasaun feto potensiál iha munisípiu Ataúro hodi hasa’e sira-nia kapasidade oinsá atu motiva sira kandidata-an ba iha eleisaun lideransa komunitáriu ne’e mak sei akontese iha fulan ida-ne’e nia-laran.
Reprezentante Administradór Munisípiu Ataúro, Francisco da Costa, husu ba feto potensiál Ataúro atu kandidata an ba iha lideransa komunitáriu, atu hamutuk ho mane hadi’a munisípiu Ataúro ba dezenvolvimentu ne’ebé prósperu.
“Agradese ba SEI tanba iha interese atu promove feto Ataúro sai lideransa, enkoraja inan feton sira atu kandidata an ba xefe aldeia no xefe suku, dalaruma distánsia suku aldeia sai obstákulu atu feto sira kandidata an maibé destánsia la’ós obstaklu. Servisu xefe duku ho xefe aldeia ne’e defisil maibé bainhira ita servisu hamutuk servisu hotu sei la’o ho di’ak , bainhira eleitu xefe suku. Ita sei la servisu mesak maibé iha estrutura ne’ebé sei apoiu atu halo servisu sistema patriakal ne’ebé ita-nia beiala sira husik hela mai ita katak ita-nia sistema ne’e pátriakal maibe ida ne’e termonolojia ida ne’ebé ita uza sala tanba feto ho mane ne’e sai hanesan parseiru atu mane ho feto tenke rona malu,” nia katak.
Pontu Fokál Asosiasaun feto Potensiál Munisípiu Ataúro, Alcina Baptista husu ba feto Ataúro oan sira atu labele ta’uk kandidata an ba xefe suku no Xefe aldeia hodi kompete ho mane sira atu hadi’a dezenvolvimentu iha suku.
“Hanesan reprezentante feto potensiál iha munisípiu Ataúro hateten ba ha’u-nia bin, ha’u-nia alin sira-ne’ebé mak partisipa ona iha formasaun ne’e atu kandidata an ba iha eleisaun lideransa komunitáriu hodi kompete ho mane sira atubele denzenvolve rai Ataúro ne’e, hatudu ba mane ita mós prontu lidera, ha’u fiar katak feto maluk sira ne’ebé mak tuir ona formasaun ne’e iha koñesementu kona-ba jestaun lideransa barak mak sei kandidata an no fiar katak periódu 2023-2030 xefe suku feto sei eleitu iha munsísipiu Ataúro,” nia motiva.
Atividade formasaun hala’o iha sede suku Vila Maumeta, munisípiu Ataúro partisipa husi kandidata no feto potensiál na’in-40 husi suku lima (5) , aldeia 19. Atividade ne’e realiza ekipa nasionál servisu hamutuk ho pontu Fokál Munisípiu Ataúro.
Jornalista: Osória Marques
Editór: Evaristo Soares Martins
