COVALIMA, 09 Outubru 2023 (TATOLI) – Empreza Timor Holding ne’ebé hetan autorizasaun husi Inspesaun-Jerál Jogu (IGJ, sigla portugés) hodi loke slot macinhes iha munisípiu Covalima sei selu taxa 25% ba kofre Estadu.
Aleinde selu taxa arrendamentu rai fó mós serbisu ba Covalima oan sira hamutuk 100-resin.
Diretór-Ezekutivu Timor Holding, Lourenço de Oliveira, hatete iha abertura jogu slot machines katak taxa 25% ne’e depende ba lukru ne’ebé empreza hetan.
“Ezemplu hetan osan rihun 100 ne’e selu taxa rihun 25 ba Estadu no aumenta 15% iha área sosiál hodi ajuda kbiit-la’ek, ema moras no desportu”, esplika.
Administradór munisípiu Covalima, Francisco de Andrade, hatete fatin ba loke jogu slot machines ne’e empreza reabilita gedung wanita ne’ebé antes ne’e sai fatin ba animál sira no soe lixu hodi sai uma di’ak.
“Iha inaugurasaun no lansamentu jogu kazino ne’e ha’u hato’o agradese ba diretór kompañia Timor Holding tanba antes ne’e uma ida-ne’e animál nia fatin no sampah fatin, maibé Timor Holding halo reabilitasaun sai uma luxu iha munisípiu Covalima”, autoridade ne’e dehan.
Iha sorin seluk, Komandante Polísia Nasionál Timor-Leste munisípiu Covalima, Superintendente Calisto Gonzaga hateten nia parte sei garante seguransa tanba empreza hetan ona autorizasaun husi IGE.
“Kompañia iha lisensa tanba Governu lokál liuhusi autoridade autoriza, nune’e parte seguransa garante ba sidadaun sira ne’ebé mai iha ne’e”, dehan.
Jornalista: Celestina Teles
Editora: Maria Auxiliadora
