DILI, 09 outubru 2023 (TATOLI) – Fakuldade Agrikultura, Departamentu Peska no Siénsia Mariña, iha Universidade Nasionál Timor Lorosa’e (UNTL) sei falta dosente iha área espesífika iha hodi apoia prosesu aprendizajen ba estudante sira.
Reitór UNTL, João Soares Martins, hatete falta rekursu ne’e hanesan dezafiu boot ne’ebé departamentu hasoru, maibé nia husu ba dekanu Fakuldade Agrikultura atu buka solusaun ba problema ne’e.
“Ita-nian Departamentu Peska no Mariña agora iha problema, maibé ita sei halo esforsu atu halo rekrutamentu hodi asegura estudante sira-nian prosesu aprendizajen labele paradu”, dirijente UNTL hatete iha Colmera, ohin.
Kestaun ida ne’e universidade relata ona ba Ministru Ensinu Superiór, Siénsia no Kultura, José Honório Jerónimo, atubele hetan koñesimentu hodi akompaña prosesu sira ne’e hotu.
Dekanu Fakuldade Agrikultura, Vicente Correia, afirma katak departamentu ne’e foin mak eziste tinan haat no hetan ona akreditasaun. Estudante balun prepara ona atu simu graduasaun.
Dekanu salienta katak problema ne’ebé departamentu enfrenta maka dosente sira ne’ebé antes ne’e funda kursu refere deside rezigna-aan, nune’e hamosu difikuldade no polémika entre dosente no estudante sira.
“Maibé fakuldade halo nafatin esforsu hodi buka maneira atu kursu ne’e labele mate tanba estudante sira barak maka tama ona semestre ualu no hein de’it atu simu graduasaun”, katak.
Daudaun ne’e, Departamentu Peska no Siénsia Mariña iha dosente na’in-hitu – lima kontratadu no rua voluntáriu. Iha estudante hamutuk 600-resin ne’ebé tama ona ba semestre ualu.
Jornalista: Tomé Amado
Editora: Maria Auxiliadora
