DILI, 09 outubru 2023 (TATOLI) – Membru FALINTIL-Forsa Defeza Timor Leste (F-FDTL) hamutuk 126, tuir formasaun Alferis iha Komandante Nicolau Lobato, Metinaro, ohin.
Membru F-FDTL 126 kompostu hosi militár sira ne’ebé mak rekrutadu iha 2001 to’o 2004 kompostu hosi mane hamutuk 100 no feto 26.
Maihosi Kuartel Jenerál 34, Komponente Terrestre 16, Komponente Navál 17, Komponente Aero e Ligeira ida, Unidade Apoiu Servisu iha16, Sentru Instrusaun Komandante Nicolao Lobato 21, Polísia Militár 16 no Unidade FALINTIL na’in lima.
Membru F-FDTL hirak ne’e sei frekuenta formasaun ofisiál durante fulan haat iha Sentru Instrusaun Komandante Nicolao Lobato Metinaro.
Durante formasaun, matéria ne’ebé mak membru F-FDTL 126 sei hetan mak treinamentu militár, hirk ne’e maioria sira ho deviza serjentu no sei promove atomatikamente membru F-FDL 126 deviza Alferis.
Xefe Estadu Maiór Jenerál F-FDTL, Briadeiro Jenerál, José da Costa Soares “Trix”, hateten formasaun ba membru F-FDTL 126 hosi deviza serjentu ba Alfer ne’e nu’udar momentu memoravél tebes no orgullu tanba membru F-FDTL sira-ne’e servi ona F-FDTL besik tinan rua nulu nia laran ho loialidade no responsablidade ba instituisaun F-FDTL.
Nia dehan, dedikasaun ba dever presiza pasiénsia, loialidade, liuliu patriotismu, nasionalismu nu’udar hahalok fundamentál hosi instituisaun F-FDTL, hanesan Militar ne’ebé iha ona kuadru permanente, la kle’ur atu sai bo’ot ba sira-nia responsablidade atu apoiu valór ne’ebé di’ak liu.
“Previlejiu hodi simu ita bo’ot sira iha Sentru Instrusaun Komandante Nicolao Lobato, mai husi komponente no unidade, hodi halao ita bo’ot sira-nia formasaun kona-ba treinamentu militár hodi sai ofisiál militár foun, ne’ebé profesionál hodi servi ita-nia povu no nasaun”, Xefe Estadu Maiór Jenerál F-FDTL, Briadeiro Jenerál, José da Costa Soares “Trix dehan liuhosi komunikadu ne’ebé Tatoli asesu, ohin.
Iha komunikadu ne’e hateten, polítika Komandu F-FDTL nian mak asegura katak militár hothotu bele hala’o papél ida ne’ebé mak kompleksu no signfikativu iha aspetu hotu husi forsa defeza nian.
“Husu ba membru hirak ne’ebé partisipa formasaun atu hakas aan iha formasaun no treinu, tanba preparasaun no esperansa hodi fó prestijiu ba instituisaun F-FDT”, nia dehan.
Komandate Trix hateten ho formasaun ne’e bele hametin fiar ba membru F-FDTL 126 oinsá atu ofisiál ne’ebé di’ak tenke respeita no defende direitu ho dignidade pesoál, hothotu ne’ebé servisu iha fileira forsa Armada atu mantein espiritu patriotizmu.
“Hau fia’r katak ita boot sira sei foti responsablidade ne’e ho sériu. Ohin hahú faze foun hodi forma sira sai ofisiál militár, faze ida-ne’e sei inklui kombinasaun militár ne’ebé luan”, sita hosi nota.
Jornalista: Natalino Costa
Editór : Zezito Silva
