Carrier Fuel no PITSA inaugura postu kombustivel foun iha Metiaut

DILI, 10 outubru 2023 (TATOLI) – Empreza nasionál Carrier Fuel no Pertamina Internasionál Timor (PITSA) inaugura postu kombustivel foun iha área Metiaut, Dili.

Diretór Carrier Fuel, Adolfo António Belo ‘Maumeta’, esplika katak presesu loke postu kombustivel ne’e hahú iha 2021 no iha tinan ne’e mak foin hetan lisensa atu halo atividade.

“Nu’udar ema rezisténsia ida hakarak lori dezenvolvimentu ne’e bá besik povu, entaun loke mina iha ne’e hodi mikrolete bele sosa besik no sei loke tan bá munisípiu sira hotu”, dehan iha ámbitu inaugurasaun postu ne’e.

Carriel Fuel sei emprega joven na’in-ualu hodi serbisu iha fatin ne’e no planu ba futuru sei tau kaixa multibanku (ATM, sigla inglés) hodi fasilita ema ne’ebé hela besik ne’e.

“Estasaun kombustivel ne’e konstrui ho osan besik rihun $300 ne’ebé serbisu hamutuk ho PITSA hanesan fornesedór prinsipál”, informa.

Diretór-Ezekutivu PITSA, Beny Harto Wijaya, kontente tanba bele serbisu hamutuk ho Carrier Fuel tanba esforsu durante tinan tolu nia-laran hafoin bele harii estasaun kombustivel ida ne’e.

“Ita mós haree ba nesesidade kombustivel iha Timor-Leste komesa aumenta, nune’e ezisténsia postu ida ne’e sei fasilita komunidade sira hela besik iha ne’e no ba transporte públiku sira. Ita mós iha ona staff ne’ebé treinadu, sira mesak timoroan de’it. Ba oin sei loke loja no fasilita ATM. Ita hakarak hakbesik bá komunidade ne’ebé presiza”, Beny Wijaya salienta.

Xefe suku Metiaut, Mateus da Costa, relata katak krisaun postu kombustivel ne’e lori prosesu kle’ur tanba problema kona-ba rai, kestaun ambientál ho nia risku sira hotu, depois komunidade balun la aseita loke postu ne’e.

“Hirak ne’e hotu halo kompañia esforsa no prosesu ne’e hotu to’o ohin loron realiza tanba de’it atu fó serbisu ba ita-nian joven sira”, realsa.

Jornalista: Osória Marques

Editora: Maria Auxiliadora