CNE Oé-Cusse sei destaka ofisiál 63 superviziona eleisaun suku
OÉ-CUSSE, 10 outubru 2023 (TATOLI – Diretór Komisaun Nasionál Eleisaun (CNE, sigla portugés) Rejiaun Administrativa Espesiál Oé-Cusse Ambeno (RAEOA), Tomas Oqui Meta, hateten, parte CNE prepara ona ofisiál hamutuk na’in-63 hodi halo supervizaun ba lala’ok eleisaun suku iha suku 18 no aldeia 63 iha territóriu Oé-Cusse.
“Tán ne’e ita fasilita formasaun ba sira durante loron rua, komesa horisehik no ohin, ofisiál sira hamutuk 63 atu destaka iha suku 18 ba aldeia 63 iha Oé-Cusse, atu halo supervizasaun ba eleisaun suku,” Tomas Oqui Meta ba Tatoli iha Oé-Cusse, tersa ne’e.
Nia informa, formasaun ne’e materiá liga direita ba sira-nia kna’ar atu halo supervizaun ba lala’ok eleisaun nune’e ne’e la’o-tuir regulamentu.
“Sira sei destaka iha aban kuarta 11, atu prepara tanba meja eleisaun suku prepara ona, atu akompaña enkontru membru konsellu suku sira sede suku idak-idak, atu hili membru na’in-tolu hodi sai hanesan meja eleitorál suku, atubele simu kandidatu xefe suku sira, to’o loron loron 13 sei kontinua akompaña prosesu aprezentasaun kandidatura to’o loron eleisaun 28 outubru 2023,” nia akresenta.
Tuir nia, kna’ar ofisiál sira diferente tanba eleisaun suku la hanesan ho eleisaun parlamentár no eleisaun prezidensiál tanba iha kompeténsia ne’e la hanesan.
“Tanba iha prosesu eleisaun parlamentár ho prezidesiál ne’e iha mós kampaña, prosesu votasaun ne’e dirije hosi brigada no poling-staf, agora eleisaun suku ne’e la hanesan, tanba laiha kampaña, maibé tau matan ba meja eleitorál suku sira, meja asembleia jerál aldeia ninia lala’ok servisu ne’e la hanesan,” nia afirma.
Tanba iha loron 28 outubru foin aprezenta kandidatura, sé mak pasa la pasa, depois meja eleitorál mak sei dirije eleisaun suku ne’e atu la’o oinsá, tan ne’e mak iha diferente, matéria atu aprezenta ba sira mós diferente.
Notísia relevante: CNE Oé-Cusse ensera edukasaun sívika iha Pante Makasar prepara ba eleisaun suku
Jornalista : Abílio Elo Nini
Editór : Evaristo Soares Martins
