Governu-UE diskute asuntu agrikultura iha TL
DILI, 10 outubru 2023 (TATOLI) – Vise Primeiru-Ministru, Ministru Koordenadór Asuntu Sosiál no Ministru Dezenvolvimentu Rurál no Habitasaun Komunitária, Mariano Assanami Sabino, reune ho Uniaun Europeia (UE), hodi diskute asuntu agrikultura iha Timor-Leste.
“Ha’u sente kontente tebes, ohin bele rona diretamente programa husi Vise Primeiru-Ministru hodi ami diskute asuntu labarik nian no diskute mós asuntu dezenvolvimentu rurál no asuntu agrikultura ne’ebé sai prioridade ba Timor-Leste”, Reprezentante UE iha Timor-Leste Marc Fiedrich, dehan ba jornalista sira iha Palásiu Governu, ohin.
Marc dehan, Governu Timor-Leste prepara ona komisaun internál ida atu haree ba asuntu Primeira Infánsia (Early Childhood) oinsá labarik sira bele hetan oportunidade ba atividade sira ne’ebé mak hala’o durante apoiu hosi UE.
Iha setór agrikultura, parte rua diskute oinsá toos na’in-sira bele servisu di’ak, tanba ne’e UE foti ona inisiativa servisu hamutuk ho SEFOPE hodi fó treinamentu vokasionál ba toos nain-sira iha área rurál.
Aleinde ne’e, diskute mós asuntu bee-moos nian oinsá UE bele hola parte, tanba aspeitu ne’e importante liu.
“Loos duni katak nasaun balun investe ona iha setór bee-moos, maibé Komisaun UE ko’alia oinsá Timor-Leste bele simu empréstimu oituan hodi investe iha setór bee-moos hodi fornese ba povu sira iha área rurál”, nia hakotu.
Jornalista: Hortencio Sanchez
Editór : Zezito Silva
