Hein tinan naruk, família 407 iha Fatumea asesu ona enerjia elétrika
COVALIMA, 10 outubru 2023 (TATOLI) – Iha outubru tinan ne’e fó kontente rasik ba populasaun iha suku tolu no aldeia 12 iha postu administrativu Fatumea iha munisípiu Covalima. Tanba, hafoin hein tinan naruk, ohin bele asesu ona ba enerjia elétrika.
Uma-kain 407 iha suku Fatumea, Nanu no Belulik Leten moris iha nakukun laran dezde tempu okupasaun Indonézia. Hafoin Timor-Leste ukun-aan tinan 21, iha loron 10 outubru, komunidade sira aproveita ona liña eletrisidade ne’ebé foin inaugura husi Vise-Ministru Infraestrutura, Júlio do Carmo, Sekretáriu Estadu Eletrisidade Água no Saneamentu, Santos Noronha, no Vise-Prezidente EDTL, E.P, Júlio de Jesus Gonçalves.
Francisco Tilman abitante ida iha Fatumea sente satisfeitu tanba hahú husi okupasaun Indonézia to’o país ne’e independente, foin mak bele hetan naroman no ba nia sente ona ukun rasik-aan.
“Ami kontente tanba hahú okupasaun Indonézia ami moris iha nakukun laran tanba la asesu eletrisidade, Timor-Leste ukun rasik-aan tinan 20-resin foin mak asesu”, nia konta hafoin partisipa iha serimónia inaugurasaun liña elétrika iha Fatumea.
Vise-Ministru Infraestrutura, Júlio do Carmo, husu ba populasaun sira ne’ebé hanesan mós konsumidór eletrisidade atu uza ho kuidadu no labele gasta enerjia bainhira lapresiza. “Disiplina uza ahi, kontrola ho di’ak nune’e bele uza ho kle’ur”, sujere.
Administradór Postu Administrativu Fatumea, Geraldo Orleãs, relata durante ne’e komunidade halerik ba eletrisidade, maibé ohin bele responde ona sira-nian ezijénsia.
“Ha’u agradese ba Governu tanba komunidade postu Fatumea asesu ona eletrisidade. Ida-ne’e mak rezultadu serbisu iha baze”, afirma.
Projetu Eletrifikasaun Nasionál (PEN) pakote 13, iha Suku Fatumea ho Nanu ho distánsia média tensaun sirkuitu kilómetru (Kms)10, baixa tensaun sirkuitu kilómetru 19 no iha instalasaun no transformadór unidade tolu.
Obra refere halo husi empreza Royal Rest no Delta Dini ho durasaun kontratu fulan neen ho verba $657.805.69.
Jornalista: Celestina Teles
Editora: Maria Auxiliadoraa
