Médiku Vincent Braganza entrega mákina sonografia rua ba CVTL no KBP
DILI, 10 outubru 2023 (TATOLI) – Médiku Vincent Braganza husi Alemanha entrega mákina sonografia (USG) ho unidade rua, ida ba Cruz Vermelha Timor-Leste (CVTL) no ida Klínika Pairo Pite hodi uza atende ba pasiente sira.
“Ha’u oferese mákina sonografia (USG) ba Timor-Leste liuliu ba Kruz Vermelha Timor-Leste no mós Klínika Bairo Pite hodi uza halo atendimentu ba pasiente timoroan sira-nia saúde hodi atinje planu estratéjiku dezenvolviemntu nasionál 2011-2030”, Médiku Vincent Braganza dehan iha nia diskursu iha serimónia entrega mákina sonografia USG iha Bairo Formoza, ohin.
Médiku Vincent Braganza mai Timor leste liuhosi Prezidénsia Republika no koordenasaun ho Ministériu Saúde hodi halo misaun servisu voluntáriu iha Timor-Leste durante fulan ida. Ho kontribuisaun ne’e foka liubá pasiente timoroan dezde 2014.
“Ha’u-nia misaun iha Timor-Leste halo programa no halo tratmentu ba pasiente sira iha HNGV, no mós fó formasaun ba médiku timoroan hamutuk 80, iha área kardiovaskular nian atu utiliza sistema ultrasónika USG no halo operasaun ba anastesia jerál sira”, nia esplika.
Médiku Vincent Braganza disponibiliza formasaun ba médiku sira iha Klínika Bairo Pite no Cruz Vermelha Timor-Leste hamutuk 20, fó formasaun ba médiku sira iha Asosiasaun Médiku Timor-Leste (AMTL) hamutuk 20, formasaun ba médiku sira iha Hospitál Referál Maliana hamutuk 20 no fó formasaun ba médiku sira iha HNGV hamutuk 20.
Iha fatin hanesan, Xefe Casa Civil iha Palásiu Prezidénsial, Jesuinha Maria Ferreira Gomes, hateten médiku Brangaza mai Timor-Leste liuhosi Prezidénsia Repúblika mak fasilita nia viajen hodi fó formasaun no fó konsulta ba pasiente sira no entrega USG rua, ida ba CVTL no id aba Klínika Bairo Pite.
“Durante médiku Braganza nia estadia iha ita-nia rain ho durasaun besik fulan ida, entaun doutór fó ona formasaun ba médiku timoroan hamutuk 80, husi númeru ne’e 20 husi Hospitál Referál Maliana, 20 husi AMTL, 20 husi CVTL no klínika Bairo Pite, 20 médiku husi HNGV”, Jesuinha Maria Ferreira Gomes esplika.
Prezidente Cruz Vermelha Timor-Leste (CVTL), Madalena Hanjam, agradese ba doutór Braganza ne’ebé entrega ekipamentu USG ida-ne’e hodi ajuda médiku sira halo diagnosa ba pasiente sira molok sira atu halo transferénsia.
Diretór Ezekutivu Klínika Bairo Pite, Inacio do Santos, agradese mós ba doutór Braganza ho apoiu mákina USG ida-ne’e hodi utiliza ba inan isin rua sira ne’ebé mak mai halo tratamentu.
“Ita agradese ba Doutór Braganza ba apoiu mákina USG ida mai ita, entaun ita utiliza mákina ne’e hahú aban hodi halo atendimentu ba inan isin rua sira tanba mortalidade ba bebé aas, ho mákina ne’e bele deteta sedu kondisaun bebé nian iha inan nia kanotak bainhira moris mai”, Santos konklui.
Jornalista : Felicidade Ximenes
Editór : Zezito Silva
