BAUCAU, 10 outubru 2023 (TATOLI) – Grupu joven hosi adeptu futeból hamosu konfrontu bainhira partisipa iha jogu komunitária iha suku Letemumu, postu administrativu Quelicai, munisípiu Baucau.
Segundu Komandante Polísia Nasionál Timor-Leste (PNTL) munisípiu Baucau, Superintendente asistente, José Casemiro, esplika, konfrontu refere akontese tanba mosu provokasaun entre adeptu sira bainhira asiste jogu futeból komunitária hodi selebra loron independénsia 28 novembru iha loron-sábadu, 07 outubru.
“Kazu asaltu hodi tuda malu ne’e, ita-nia PNTL eskuadra Quelicai halo intervensaun maibé rekursu menus entaun utiliza gás hodi hakalma situasaun,” Segundu Komandante PNTL Baucau hateten iha Vila Nova, tersa ne’e.
PNTL liuhosi eskuadra postu Quelicai la rejista vítima ruma kanek no seidauk detein autór ruma maske konfrontu refere entre adeptu envolve mós jogadór balun.
“Eskuadra Quelicai kontinua halo identifiksaun ba autór ligadu ho kazu ne’e,” José Casemiro akresenta.
Maske nune’e, parte seguransa deside kontinua jogu refere tuir oráriu ne’ebé parte Komisaun Organizadora prepara ona no husu atu komunidade parte Letemumu kolabora hodi fó susesu ba kompetisaun futeból iha suku refere.
Jornalista : Natalino Belo
Editór : Evaristo Soares Martins
