DILI, 10 outubru 2023 (TATOLI) – Negosiante sira iha merkadu Taibesi kontinua enfrenta problema kanalizasaun bee-moos, nune’e haris fatin públiku la funsiona.
Vendedór na’an iha merkadu Taibesi, José Freitas, hateten, bee-moos laiha no haris fatin iha merkadu Taibesi taka kle’ur ona, kuandu presiza haris fatin tenke fila ba uma.
“Ami sosa bee litru lima ho folin sentavu 0,05. Ne’ebé difikulta tebes ami atu halo negosiua ka faan na’an iha merkadu ne’e,” dehan Vendedór ne’e ba Agéncia TATOLI iha merkadu Taibesi.
Nia dehan, maske governu konstrui merkadu ne’e, maibé laiha jestaun di’ak no laiha reparasaun nune’e fatin ne’e laiha kondisaun ijiene no la saudavél ba negosiante no konsumidór sira.
Iha biban hanesan, Vendedór Miquel Soares reforsa merkadu ne’e laiha jestaun di’ak tanba la halo repara ba vendedór sira faan sasan, nune’e ema faan sasan tuir nia hakarak hodi difikulta negosiante balun deside ba fa’an iha dalan-ninin.
“Foun-foun, ami mai ne’e governu fó buat hotu kompletu, mas la mai halo reparasaun nune’e laiha ona kondisaun atu faan sasan. Tanba ne’e husu governu tenke kria kondisaun atua mi faan sasan hodi nesesita ami nia moris lor-loron nian”, nia sujere.
Ho difikuldade ne’e, negosiante ne’e afirma vendedór barak mak deside sai hosi merkadu hodi ba faan iha dalan-ninin.
“Ita ba faan sasan iha dalan ninin mós governu duni tun sa’e, maibé la kria kondisaun iha merkadu atu negosiante sira bele tuur hakmatek hodi faan sasan”, nia lamenta.
Responde kestaun ne’e, Xefe Departamentu Operasionál Jestaun Merkadu Taibesi, Gaspar da Silva, rekoñese kanalizasaun bee-moos iha merkadu Taibesi, hahú janeiru to’o outubru ne’e laiha tanba bomba bee mak avaria ona.
“Ha’u aprezenta pedidu ida ne’e ba ona Prezidente BTL no tékniku BTL mai duni hadi’a hodi funsiona fila-fali, maibé la kle’ur de’it avaria fali”, nia informa
Tanba ne’e, daudaun ne’e negosiante sira sosa rasik bee moos hodi fase sira-nia produtu no uza mós ba sira-nia nesesidade iha merkadu Taibesi. Sira (negósiante) sosa bee hosi tanki ne’ebé faan bee moos entaun ho difikuldade ne’e, jestaun merkadu esforsu nafatin atu oinsá hosi parte Governu haree bee, hodi fornese volume ne’ebé boot ba merkadu Taibesi.
“Ha’u esforsu atu buka solusaun hodi hadi’a haris fatin atu nune’e vendedor sira bele utiliza fila fali”, nia promote.
Notísia relevante:Merkadu Taibesi menus bee-moos
Jornalista: Jesuína Xavier
Editor : Florencio Miranda Ximenes
