Ofisiál supervizaun eleisaun suku na’in-283 finaliza formasaun iha Baucau
BAUCAU, 10 outubru 2023 (TATOLI) – Ofisiál supervizaun eleitorál hosi Komisaun Nasionál Eleisaun (CNE, sigla portugés) finaliza ona formasaun hodi prepara hasoru eleisaun suku iha Baucau.
Diretór CNE Munisípiu Baucau, Esmeraldo Damião Belo, esplika, ofisiál supervizaun eleitorál hirak-ne’e tuir formasaun durante loron-rua hahú iha segunda, 09 no loron 10 fulan-outubru nune’e sei kontinua destaka ba terrenu hodi akompaña prosesu hotu kona-bá eleisaun suku.
“Ha’u sente formasaun ne’e sufisiente ona atu garante supervizaun katak sira iha ona koñesementu hodi hasoru eleisaun suku tinan ne’e,” Diretór CNE Munisípiu Baucau hateten iha Sentru Konvensaun Baucau (CCB, sigla portugés) Vila Antiga, tersa ne’e.
Matéria importante iha formasaun refere mak hanesan lei númeru 9/2016 kona-ba suku, órgaun administrasaun eleitorál, krime eleisaun no papél ofisiál supervizaun iha terrenu ne’ebé hato’o direita hosi fasilitadór na’in-rua hosi nasionál no munisípiu.
Esmeraldo Belo husu ba ofisiál supervizaun eleitorál sira atu labele pasivu bainhira iha tendénsia mosu krime eleitorál hanesan implementa maneira K4 komposta hosi koordena, koopera, komunika no konsidera.
CNE Baucau preparadu atu apoia autoridade munisipál inklui Sekretariadu Tékniku Administrasaun Eleitorál (STAE) hodi fó susesu ba eleisaun komunitária iha loron-28 fulan-outubru tinan-ne’e.
Hosi totál 283 ne’e, ofisiál supervizaun na’in-281 sei hala’o knaar iha postu administrativu neen, suku 59 no aldeia 281, enkuantu na’in-rua mak sei apoia iha eskritóriu CNE munisipál.
Jornalista : Natalino Belo
Editór : Evaristo Soares Martins
