iklan

EKONOMIA, BAUCAU, HEADLINE, MUNISÍPIU

OJE 2024: Baucau propoin millaun $6-resin no prepara hela adisionál atu aprezenta ba KROP

OJE 2024: Baucau propoin millaun $6-resin no prepara hela adisionál atu aprezenta ba KROP

Sekretária Autoridade Munisipál Baucau, Simão dos Santos Marques Pinheiro. Imajen : Agênsia TATOLI/Natalino Belo

BAUCAU, 09 outubru 2023 (TATOLI) – Tetu orsamentu ba Autoridade Administrasaun Munisipál Baucau tinan-2024 hamutuk $6,897,584.00 no oras ne’e prepara hela orsamentu adisionál atu aprezenta ba Komisaun Revizaun Orsamentu nível Polítika (KROP) ne’ebé organiza hosi Ministériu Finansa.

Sekretáriu Administrasaun Munisipál Baucau, Simão dos Santos Marques Pinhero, esplika, hosi totál orsamentu refre la envolve kapitál minor nune’e fahe ba rubrika haat komposta hosi saláriu no vensimentu $1,925,171.00, bens no serbisu $462,627.00, kapitál dezenvolvimentu $92,916.00 no transferénsia publika $4,416,825.00.

“Iha tinan-2024, orsamentu mai munisípiu Baucau iha redusaun hamutuk pursentu 9 korrespondénsia rihun $667-resin kompara ho orsamentu tinan-2023,” Sekretáriu Munisipál Baucau informa ba Agência TATOLI iha Vila Nova, segunda ne’e.

Autoridade Baucau prepara ona orsamentu adisionál iha rubrika kapitál dezenvolvimentu hamutuk $2,662,086.79 no sei hato’o iha Komisaun Revizaun Orsamentál (KROP) tanba aloka ba reapropriasaun projeitu tolu tinan-2023 inklui projetu foun lima iha tinan 2024.

Alende ne’e, prepara mos adisionál ba saláriu no vensimentu $279,019,00, bens serbisu $231,313,50 hodi utiliza ba sosa kaixaun ba família vulnerável no kombustível ba karreta multi funsaun no adisionál ba kapitál minor $161,600,00 ne’ebé sei aloka ba sosa ekipamentu informátika ba ofisiál na’in-tolu iha kada suku inklui sosa karreta tanki bee ida.

“Liuhosi diresaun finansasno ajénsia planeamentu ita prepara ona adisionál atu aprezenta hikas, hein de’it Prezidenti Autoridade atu ba defende,” Simão Pinheiro akresenta.

Autoridade Munisipál Baucau sujere atu governu sentrál liuhosi Ministériu Finansa konsidera proposta orsamentu adisionál tanba bazea ba nesesidade no kondisaun povu iha munisípiu Baucau.

Desizaun prepara adisionál hamutuk $3,330,019.25 tanba liuhosi prosesu fazeadamente hanesan votasaun iha Reuniaun Konsellu Koordenasaun Munisipál no Reuniaun Konsellu Konsultivu Munisipál.

Jornalista   : Natalino Belo 

Editór         : Evaristo Soares Martins 

iklan
iklan

Leave a Reply

iklan
error: Content is protected !!