PNTL Baucau preparadu asegura eleisaun suku iha Baucau
BAUCAU, 10 outubru 2023 (TATOLI) — Komandu Polísia Nasionál Timor-Leste (PNTL) munisípiu Baucau preparadu asegura eleisaun suku iha tinan ne’e.
Segundu Komandante PNTL munisípiu Baucau, Superintendente Asistente, José Casemiro, esplika, parte seguransa hala’o ona preparasaun liuhosi koordenasaun ho autoridade munisipál nu’udar na’in inklui Sekretariadu Tékniku Administrasaun Eleitorál (STAE) nu’udar apoia tékniku.
“PNTL sempre prontu iha kualkér tempu atu asegura programa estadu nian,” Segundu Komandante PNTL Baucau hateten iha Vila Nova, tersa ne’e.
Liña koordenasaun ne’ebé hala’o entre STAE ho PNTL ligadu ho estabElesementu sentru votasaun liuliu iha distánsia dook no sentru votasaun ne’ebé besik hodi koloka membru tuir situasaun iha terrenu.
Kona-bá koloka membru iha terrenu sei bazea ba totál númeru na’in-183 nune’e sei hato’o proposta ba komandu jerál atu aumenta tán membru hosi nasionál hodi apoia fó susesu ba eleisaun suku iha Baucau.
“Ami husu tán apoia membru na’in-100 maibé tuir mos kondisaun rekursu iha komandu,” Superintendente Asistente José Casewiro akresenta.
PNTL husu ba kada kandida xeei suku atu hatudu maturidade polítika hodi eduka komunidade liuliu bele fó susesu prosesu eleisaun komunitária iha ámbitu pás no estabilidade.
Jornalista : Natalino Belo
Editór : Evaristo Soares Martins
