VIQUEQUE, 10 outubru 2023 (TATOLI)—Vise-Ministru Administrasaun Estatál (MAE), Jacinto Rigoberto de Deus, konsidera munisípiu Viqueque poténsia boot sai kámara munisipál, tanba ne’e tenke prepara kondisaun.
“Viqueque ne’e rai riku no Viqueque-oan matenek barak, ha’u fiar katak tinan-rua mai tan bele prepara kondisaun mínimu ba kámara munisipál, Viqueque bele kompete ba eleisaun kámara munisipál. Tanba ne’e, Primeiru-Ministru apela atu halo mapamentu ba levantamentu dadus hodi hatene munisípiu oan sira-ne’ebé daudaun serbisu iha Dili no iha ministériu sira hodi fila hotu ba munisípiu, atu ida-idak halo dezenvolvimentu iha ninia munisípiu,” governante ne’e hateten durante atividade avaliasaun ba programa no serbisu PNDS, iha administrasaun munisípiu Viqueque, tersa ne’e.
Notísia relevante : Xanana hakarak konsensu iha implementasaun poder lokál no desentralizasaun
Nia dehan, hosi inísiu tenke prepara baze legál ba desentralizasaun poder lokál tanba tempu ona atu implementa.
“Kompromisu IX Governu Konstituisionál liuhosi MAE mak sei aselera implementasaun programa dezentralizasaun poder lokál, tanba ne’e hakarak ka lakoi molok manadatu ramata sei implementa atu ukun sira-ne’e bele tun baze. Hodi abranje komunidade liu-liu ba joven sira bele hola parte iha ukun nia laran, tanba daudaun ita-nia oan sira ramata sira-nia estudu serbisu laiha, joven sira halai hotu ba Dili no balun bá rai-li’ur, maibé ita iha ne’e poténsia barak. Tanba ne’e, ita tenke aselera dezentralizasaun poder lokál,” nia akresenta.
Vise-Ministru salienta, ba dezentralizasaun podér lokál daudaun ministériu prepara hela esbozu dekretu-lei atu aprezenta ba Konsellu Ministru, nune’e tinan 2024 estatutu ba munisípiu hotu sai nu’udar autoridade.
Inisiativa ne’e hodi nu’udar autoridade ho ninia irakia ne’ebé Governu prevee bele tulun Prezidente Autoridade hamutuk ho Administradór no Xefe suku atu prepara kondisaun mínimu kada munisípiu hodi tinan 2025 halo avaliasaun no tinan 2026 to’o 2027 bele tama ba eleisaun kámara munisipál.
“Governu liuhosi Ministériu Adminsitrasaun Estatál iha ninia programa priodade ida maka dezentralizasaun. Ho ida-ne’e, ami tenke prepara baze legál sira ba implementasaun dezentralizasaun iha baze,” nia tenik.
Jornalista : Vitorino Lopes da Costa
Editora : Julia Chatarina
