ANC sosializa regulamentu komunikasaun iha Baucau
BAUCAU, 11 outubru 2023 (TATOLI) – Autoridade Nasionál Komunikasaun kinta ne’e, sosializa kna’ar, responsabilidade no regulamentu ligada ho dekretu-lei númeru 15/2012 iha Baucau.
Diretór Tékniku ANC, Vidal Gomes, esplika, objetivu hosi atividade ne’e atu partilla informasaun komunikasaun no telekomunikasaun ligada ho serbisu no papél inklui estabelesementu gabinte tane konsumedór.
“Ita fahe informasaun ligadu ho serbisu ANC nian ho setór komunikasaun liuliu kona-bá dalan ne’ebé loos liu atu hato’o reklamasaun ka keixa ruma mak iha ANC ka bele liuhosi tane konsumidór,” Diretór Tékniku ANC hateten iha Sentru Konvensaun Baucau (CCB, sigla portugés), kuarta ne’e.
Matéria importante ne’ebé sosializa mak hanesan importánsia uza rekrusu telekomunikasaun relasiona ho internet ba pozitivu liuliu estudante no komunidade hanesan peskiza informasaun estudu no dezafiu seluk.
Bainhira rejista reklamasaun ruma hosi kliente, ANC kontinua halo aprosimasaun ho operadór telekomunikasaun tolu iha Timor-Leste hodi hamutuk solusiona hanesan devolve hikas pulsa ba kliente sira.
“Dalabarak liu kliente sira hato’o preokupasaun liuhosi mídia sosiál hanesan Facebook maibé labele hetan resposta, entaun tenke mai iha ANC,” Vidal Gomes akresenta.
Koordenadòr TElKOMCeL munisípiu Baucau, Emor Boavida, konsidera atividade ne’e importante tanba relasiona ho uzu telekomunikasaun liuliu TELKOMCEL atu futuru bele hasa’e di’ak liutan kualidade atendementu ba kliente sira.
“Importante tanba hanesan fó informasaun ba ami atu hadi’a di’ak liután liuliu kualidade internet,” Emor Boavida hateten.
TELKOMCEL iha Baucau kobre ona rede pursentu 85 no atuál kontiua aumenta infraestrutura antena hodi kompleta rede ba kliente sira hanesan iha postu Venilale, Baucau Vila iha suku Caibada no Tirilolo.
Dekretu-lei númeru 15/2012, loron28 marsu kona-ba regulamentu iha setór telekomunikasaun, prosesu rejistrasaun lisensa antena ba setór televizaun, telekomunikasaun, sansaun no koima.
Jornalista : Natalino Belo
Editór : Evaristo Soares Martins
