COVALIMA, 11 outubru 2023 (TATOLI) – Sekretáriu Estadu Eletrisidade Água no Saneamentu, Santos Noronha, sei orienta tékniku Bee Timor-Leste, Empreza Públika (BTL, E.P) iha Covalima halo levantamentu dadus ba komunidade ne’ebé seidauk asesu bee-moos iha postu administrativu munisípiu refere.
“Ha’u sei orienta ba BTL, E.P Covalima atu halo levantamentu dadus hodi haree rekursu bee iha postu Fatumea. Ita atu uza ida-ne’ebé, tanba bee iha rai okos no iha bee-matan. Ita tenke halo lavantamentu dadus”, Santos Noronha hatete.
Governante ne’e dehan bee-moos no eletrisidade sai nafatin preokupasaun ema hotu nian, la’ós ba Fatumea de’it, maibé kuaze iha territóriu. Tanba ne’e, Governu iha devér atu haree asuntu refere.
Tanba ne’e nia sei orienta tékniku sira iha nasionál no munisípiu hodi serbisu hamutuk ho autoridade lokál atu haree kestaun ne’e hodi responde ba preokupasaun povu nian.
Administradór Postu Fatumea, Geraldo Orleãs, dehan maske komunidade asesu ona eletrisidade, maibé seidauk iha bee-moos ba sira.
“Ami kontinua husu ba nai-ulun sira hodi rona nafatin komunidade sira-nian preokupasaun ne’ebé seidauk asesu bee-moos”, dehan.
Postu Fatumea, suku Fatumea iha aldeia tolu no suku Nanu iha aldeia ida mak durante ne’e sei falta bee-moos.
Koordenadór BTL Covalima, Castro Dody Ramos, fó sai dadus katak kliente iha área urbana ne’ebé asesu ona bee-moos iha família hamutuk 1.222 ka populasaun na’in-11.533.
Jornalista: Celestina Teles
Editora: Maria Auxiliadora
