France Soares asume kargu Prezidente PN durante oras haat
DILI, 11 outubru 2023 (TATOLI)—Plan International hili France Soares ho idade (16), estudante hosi Eskola Sekundária Jerál Fernando Lasama de Araújo munisípiu Ainaro, hodi assume kargu ne’ebé okupa hosi Prezidente Parlamentu Nasionál (PN), Maria Fernanda Lay, durante oras haat (4).
Notísia Relevante: PPN rekomenda Plan Internationál haforsa edukasaun sívika ba joven sira
Atividade ne’e r Plan Internasionál mak organiza hodi komemora loron mudniál labarik feto ne’ebé kada tinan selebra iha 11 outubru, hodi promove liután iha futuru labarik feto sira mós bele asume pozisaun importante sira no bele manán esperiénsia.
“Hanesan labarik feto, ha’u sente kontente tebes bainhira hetan oportunidade ida-ne’e. Tanba ami hela iha área rurál, entaun la espera atu hetan oportunidade hodi asume kargu hanesan Prezidente Parlamentu Nasionál. Entaun, realidade ba ohin loron nian, ha’u asume duni kargu sai hanesan Prezidente Parlamentu Nasionál,” France Soares hateten ba jornalista sira iha uma fukun PN.
Tanba ne’e, nia-parte sente kontente tebes tanba labarik feto hanesan nia bele iha ona esperiénsia ka koñesimentu tanba labarik feto mós bele lidera.
Durante asume kargu nu’udar Prezidente PN, France Soares, dahuluk hasoru Prezidente PN atuál, Maria Fernanda Lay, halo aprezentasaun ho deputadu sira, ba iha gabinete hodi ko’alia ho Diretora Plan Internasional kona-ba loron mundiál ba labarik feto, vizita komisaun espesializada sira inklui atividade sira seluk tan.
Prezidente Parlamentu Nasionál, Maria Fernanda Lay, hateten ba dahuluk felisita labarik feto sira nia loron no daruak atividade ida-ne’e bele enkoraja labarik sira iha futuru bele substitui karu eskluzivu sira katak feto mós bele.
“Ohin, France Soares, mai iha ne’e substitui ha’u iha atividade balun ne’ebé ami hala’o. Ha’u espera katak iha loron mundiál ba labarik feto ne’e kria atividade hanesan ne’e, hodi bele enkoraja sira iha futuru bele substitui ami katak feto mós bele,” nia hateten.
Líder segundu órgaun soberania ne’e espera, labarik feto la’ós de’it iha Ainaro maibé munisípiu sira seluk bele iha korajen no mós ba feto iha universidade hodi bele iha diskusaun asuntu nasaun ninian, atu sira bele mós iha sensibilidade, enkoraja no hanesan aprende.
“Mensajen ba labarik feto sira katak, dala ida tan feto mós iha lideransa bele. Ami mós aprende hanesan sira uluk no ohin loron ami bele iha fatin sira-ne’e. La’ós de’it iha Parlamentu maibé iha Governu no futuru Prezidente Repúblika bele feto,” nia hateten.
Country Director Plan Internasionál, Fatima Estrela Soares, hateten loron mundiál ba labarik feto ne’e, Plan Internasional iha mundu tomak inklui iha Timor-Leste selebra poder labarik feto kada tinan iha 11 outubru, no ida-ne’e Plan Internasional iha programa ida bolu “take over”, oinsá mak foti pozisaun lideransa sira-nian tantu sira hosi polítiku no setór privadu.
Nia dehan, iha momentu ne’e oinsá foti labarik sira hamrik ko’alia iha oin kona-ba bareira sira-ne’ebé mak sira sente satan netik sira, aban bainrua atu sai hanesan líder ida iha sira-nia komunidade no mós iha nasaun ida-ne’e.
Kriteira ne’ebé Plan Internasionál iha loke aplikasaun husu labarik sira aplika hafoin halo selesaun mai ho pergunta simples mai ho sira-nia kompromisu, foti pozisaun sira reprezenta lian hosi labarik feto sira hodi identifika sei reprezenta.
Ba tinan ne’e, plan Internasional hili labarik na’in-rua hodi asume pozisaun Prezidente PN no ida mak Diretora Plan Internasional rasik.
Iha fatin hanesan, Sania de Araújo (16) hosi eskola sekundáriu Jerál Fernando Lasama de Araújo Ainaro, ne’ebé asume kargu Diretora Plan Internasional, sente kontente hodi asume kargu ne’e iha oras balun nia laran.
“Loron Internasionál ba labarik feto espesiál ba labarik feto sira, tanba organizasaun Plan International hala’o influénsia no advokásia hamutuk ho ONU hodi dehan loron ohin ne’e hanesan loron Internasionál ba labarik feto,” nia hateten.
Jornalista : Nelson de Sousa
Editór : Cancio Ximenes
