DILI, 11 outubru 2023 (TATOLI)– Konfederasaun Sindikatu Timor-Leste (KSTL) kontinua husu ba Governu atu hala’o revizaun ba saláriu mínimu ba traballadór, nune’e bele dignifika no bele hadi’a moris família nian.
Tanba tuir peskiza ne’ebé KSTL halo ona iha tinan 2013 katak saláriu mínimu $115 iha Timor-Leste labele dignifika traballadór nia moris, nune’e ho baze ba kalkulasaun no análiza ida ne’ebé mak naruk, konsege determina katak traballadór sira konsidera bele moris diak iha fulan ida nia laran ho saláriu mínimu $250.
Notísia relevante: Ministru Finansa konsidera revizaun saláriu mínimu implika monetáriu OJE
KSTL nu’udar organizasaun sumriña ba sindikatu setorál sira ne’ebé mak eziste iha Timor-Leste no durante ne’e ninia k’naar halai liu ba asuntu polítiku ne’ebé iha relasaun ho área laborál.
Prezidente KSTL, Almerio Vila-Nova, hateten, iha kongresu ne’e mós aprova rezolusaun no estrátejia sira hanesan defende direitu traballadór sira kona-ba saláriu mínimu, ejize aseleira no aprovasaun ezbosu lei traballu doméstika, fortifika relasaun internasionál, violénsia no asédiu iha servisu fatin hasoru feto sira no kria diálogu ba membru subtutela iha KSTL.
“Ami hakarak fó prioridade liuliu kontinua husu ba Governu atu halo revizaun ba saláriu mínimu traballadór. Ha’u lamenta Governu seidauk fó importansia ba iha saláriu mínimu traballadór sira, maske folin sasan iha merkadu sa’e”, lamenta Prezidente KSTL, Almerio Vila Nova, ba Agéncia TATOLI iha kna’ar fatin-Dili.
Tuir nia saláriu mínimu ne’e la justu ba traballadór sira atu hetan moris di’ak no dignu, nune’e Governu kontinua abandona ezbosu lei ne’e oinsá traballadór moris iha família ho saláriu $115.
“KSTL sei kontinua servisu hamutuk ho entidade relevante sira hanesan Governu atubele hetan solusaun ba problema traballadór sira no problema sosiál”, nia promote.
Nia nota katak saláriu mínimu durante tinan lima resin ona mak Governu seidauk halo revizaun iha nível munisípiu nomós iha nível kapitál, se lae bele prejudika ema hotu mai moris iha kapitál
Molok ne’e, Ministru Finansa (MF), Rui Augusto Gomes, hateten, Governu propoin ona saláriu mínimu sa’e ba $135 iha Lei Grande Opsaun Planu (GOP), ne’ebé foin lalais aprova ona iha Parlamentu Nasionál (PN) no promulga ona hosi Prezidente Repúblika.
Maski nune’e, Ministru Finansa dehan, tinan oin (2023) bele implementa planu ne’e, ne’ebé bainhira hasa’e saláriu mínimu ne’e sei lori impaktu ba veteranu sira tanba sei hasa’e mós sira-nia subvensaun.
Antes ne’e, ezbosu lei saláriu mínimu liu ona diskusaun naruk Komisaun Nasionál Servisu (KNS), ne’ebé kompostu hosi Konfederasaun Sindikatu Timor-Leste (KSTL), Sekretariadu Estadu Formasaun Profisionál no Empregu (SEFOPE) no Kámara Komérsiu no Indústria Timor-Leste (CCI-TL, sigla portugés), molok submete ba Ministériu Koordenadór Asuntu Ekonómiku (MKAE).
Nune’e, iha loron 28 maiu 2012, KNS ne’ebé prezide hosi SEFOPE aprova saláriu mínimu $115, ne’ebé antes ne’e halo peskiza no ikus mai aplika ba FUnsaun Públika no setór privadu.
Desizaun KNT tama iha vigór iha loron tuirmai hosi Lei Traballu númeru 4/2012 loron 21 fevereiru, ne’ebé tama ona iha vigór no sei hetan revizaun hafoin liu tinan-rua, maibé to’o agora la akontese.
Saláriu mínimu seidauk halo revizaun durante tinan-10 ona, ne’ebé saláriu mínimu estabelese dahuluk ho montante $85, hafoin halo revizaun iha tinan 2012 fixa ho $115.
Notísia relevante: Governu propoin saláriu mínimu sa’e ba $135
Jornalista: Jesuína Xavier
Editór : Florencio Miranda Ximenes
