PN hetan tetu fiskál millaun $22 ba OJE 2024
DILI, 11 outubru 2023 (TATOLI)—Prezidente Parlamentu Nasionál, Maria Fernanda Lay, hateten Parlamentu Nasionál (PN) hetan tetu fiskál millaun $22 ba proposta Orsamentu Jerál Estadu (OJE) 2024.
“Ami-nia envelope fiskál iha momentu husu millaun $22, maibé depois komisaun sira ida-idak elabora ninian sa’e ba millaun $27. Klaru orsida ha’u sei hato’o iha envelope fiskál ne’ebé Governu aprova iha diskusaun iha grupu orsamentu nian para hatun, ne’ebé kontas korrente ami nian millaun $12 ho esesaun kapitál menór ho kapitál dezenvolimentu, ami tenke ajusta” Prezidente PN ne’e hateten ba jornalista sira iha uma fukun PN, kuarta ne’e.
Prezidente Parlamentu Nasionál (PN), kuarta (11 outubru 2023) ohin, konvoka sorumutu ho prezidente komisaun espesializada sira hodi diskute kona-ba tetu fiskál orsamentu privativu ba PN ba tinan oin maibé nia la esplika detallu kona-ba prioridade sira ba tinan oin.
“Prioridade ami identifika ona. Agora, entre prioridade sira-ne’ebé prioridade liu ba tinan oin,” nia dehan.
Kona-ba konstrusaun edifísiu Parlamentu Nasionál (PN) foun, nia hatán, parte PN presiza rai maibé rai laiha labele halo, tan ne’e tinan oin sei fó prioridade ba reabilita edifísiu ne’ebé daudaun utiliza hela.
“Hanoin, meloramentu edifísiu cobe house tenke hasai, tanba la seguru ba ema iha andar leten. Ne’ebé, hanoin preokupasaun ami-nian mak reabilita edifísiu, nune’e ami bele mantein nafatin serbisu,” nia hateten.
Jornalista : Nelson de Sousa
Editór : Cancio Ximenes
