Top

PPN husu Governu solusiona problema labarik feto asesu eskola la’o dook

Estudante 30 De Agostu sira la'o ain hodi asesu ba eskola, iha estrada Beto Dili, kinta (05/10). Imajen Tatoli/Francisco Sony

DILI, 11 outubru 2023 (TATOLI)—Prezidente Parlamentu Nasionál (PPN), Maria Fernanda Lay, husu Governu solusiona problema hosi labarik feto asesu ba eskola la’o ho distánsia do’ok.

“Ha’u hanoin ida-ne’e la’ós responsabilidade Governu nian de’it, maibé seguransa ba labarik feto liuliu bainhira sira ba eskola ne’e dezáfiu ida. Tanba, konversa ne’ebé ha’u ho sira iha, ha’u deteta katak sira ba eskola dook tebes liuliu sira-ne’ebé iha ensinu sekundáriu sira, iha problema distánsia dook tebes,” Prezidente PN ne’e hateten ba Agência Tatoli relasiona ho komemorasaun loron mundiál ba labarik feto ne’ebé mundu tomak no Timor-Leste (TL) komemora kada tinan iha 11 outubru, iha uma fukun PN, kuarta ne’e.

Tanba ne’e, nia husu parte ezekutivu atu tau atensaun hodi solusiona hodi harii eskola ba besik povu, atu minimiza violasaun ahsoru labarik feto sira.

“Governu sei harii eskola besik ba sira nia uma. Ha’u hanoin bairru sira-ne’ebé uluk MDG para agrupa ita halo programa sira hanesan, para evita hala’o mesak iha tempu kalan ka dadeersan sedu tanba iha violasaun ne’ebé akontese, tanba falta seguransa. Klaru katak falta seguransa la’ós falta  de’it polísia, maibé papel sosiedade seguransa ba ita-nia oan sira importante tebes,” nia hateten.

Iha parte seluk, nia hateten, PN iha lejislatura dalimak aprova ona lei protesaun ba labarik, nune’e Governu liuhosi entidade relevante sira presiza halo investimentu liután hodi asegura fó protesaun di’ak liután ba labarik ein-jerál.

Problema hanesan daudaun nasaun enfrenta mak má nutrisaun ba labarik ne’e rejista númeru aas, inklui mortalidade ba labarik, nune’e presiza atensaun.

“Ha’u hanoin má nutrisaun la’ós idade sira hanesan ne’e, maibé bebé iha inan n ia knotak mós to’o nia moris, ida-ne’e ita enfreta. Maibé, fiar katak Governu iha nia programa no Parlamentu bele fiskaliza didi’ak osan ne’ebé tau ba duni, tau matan ba nutrisaun no asuntu seluk ne’ebé presiza tau atensaun,” nia hateten.

Jornalista : Nelson de Sousa

Editór       : Cancio Ximenes

Publisidade

Leave a Reply

Latest Post

error: Content is protected !!