DILI, 11 outubru 2023 (TATOLI) – Loron Internasionál Feto Rurál selebra kada tinan iha 15 outubru, tanba ne’e Prezidente Asosiasaun Feto Munisípiu Dili (AFMD), Maria Fátima Pereira, husu atu diginifika no valoriza feto sira tanba kontribui mós ba independénsia rai ida ne’e.
“Loron Feto Rurál ne’e importante tebes tanba feto maluk mós uluk hola parte ba independénsia ida ne’e, entaun presiza Estadu no Governu nia konsiderasaun ba sira”, Maria Fátima dehan ba Tatoli iha Matadouro, ohin.
Nia dehan ho feto nia kontribuisaun mak Sekretária Estadu ba Igualdade eziste hodi fó mahon no asisténsia ba sira hodi bele hetan moris di’ak.
“SEI hamriik iha inan-feton nia leten hodi promove no fó advokásia ba sira atu kontinua envolve iha atividade saida de’it tantu iha ekonómia, polítika, sosiál no seluk tan. Ita haree ba dezenvolvimentu iha suku, postu no munisípiu feto sira hahú envolve iha atividade sira. Ita bele dehan feto mós bele no feto prontu lidera”, hatete.
Tuir nia, Loron Internasionál Feto rurál ida-ne’e hodi rekoñese kontribuisaun feto nian ba hakbiit dezenvolvimentu agríkola no haforsa seguransa ai-han hodi hamenus moris ki’ak iha área rurál.
Tuir dadus husi SEI, partisipasaun feto sira-nian ba lidera suku iha tinan 2009-2016 iha de’it pursentu rua, no iha 2016-2023 sa’e ba 5%, entaun haree hosi ne’e Asosiasaun Feto Munisípiu Dili hamutuk ho SEI no feto sira seluk esforsu no kontinua halo advokásia nune’e envolvimentu feto iha 2023-2030 tenke to’o iha 10%.
Loron Internasionál Feto Rurál hakarak subliña importánsia feto nian iha komunidade ne’ebé nia hela no nia papél esensiál ba iha atividade agríkola, sustenta família no iha jestaun rekursu naturál nian.
Jornalista: Osória Marques
Editora: Maria Auxiliadora
