COVALIMA, 11 outubru 2023 (TATOLI)- Konsellu Munisipál Kombatente Libertasaun Veteranu (KMCLV) Covalima rejista kombatente no mártir nia oan hamutuk 139 hetan bolsa estudu iha tinan ne’e.
“Veteranu no mártir nia oan ne’ebé asesu ba bolsa estudu agora trata ona konta bankária, nune’e sira bele simu osan”, Prezidente Konsellu Veteranu Covalima, Osório Soares ‘Mausoko’ hatete iha Tabakolot, ohin.
Benefisiáriu sira ne’e submete dokumentu sira atu hetan bolsa iha loron 27 fevereiru to’o 28 marsu tinan ne’e. Bolseiru sira ne’e iha ensinu báziku iha ema na’in-31, ensinu sekundáriu 37, ensinu superiór 70 no bá rai-li’ur ida.
Ministériu Asuntu Kombatente libertasaun Nasionál atribui bolsa estudu ba veteranu no mártir nia oan bazeia ba dekretu-lei númeru 8/2009, 15 janeiru, Rejime Atribuisaun Bolsa Estudu ba Kombatente no Mártir Libertasaun Nasionál nia oan.
Atribuisaun bolsa ne’e ho objetivu kontribui ba suporta despeza alimentasaun, transporte, livru no materiál eskolár, matríkula no propina.
Jornalista: Celestina Teles
Editora: Maria Auxiliadora
