DILI, 11 outubru 2023 (TATOLI) – Xefe Estadu José Ramos Horta hasoru malu ho International Finance Corporation (IFC) no Banku Mundiál hodi ko’alia kona-ba dezenvolvimentu ekonómiku iha Timor-Leste.
“Ami ko’alia ho Prezidente Repúblika kona-ba planu no atu realiza konferénsia kona-ba dezenvolvimentu ekonómiku oinsa ita bele koopera hamutuk ho Governu atu bele promove investimentu iha Timor-Leste”, reprezentante IFC iha Timor-Leste David Freedman ba jornalista sira iha Faról, kuarta ne’e.
Nia dehan, atu aselera dezenvolvimentu ekonómiku Timor-Leste nian tenke promove hosi setór privadu hodi atinje Governu nia objetivu atu halo diversifikasaun ba ekonomia.
“Ami-nia observasaun durante ne’e finansa Estadu nian iha rekursu ne’ebé di’ak, atu atinje objetivu katak empreza mós bele hetan asesu finanseiru, ita presiza hala’o programa hametin baze legál ba setór finanseiru atu bele dezenvolve kapasidade ajésnsia finanseiru iha rai laran”, nia hatete.
Iha fatin hanesan, Reprejentante Banku Mundiál iha Timor-Leste, Bernard Harborne hatete, ekonomia Timor-Leste la’o di’ak maibé iha preokupasaun oituan kona-ba tasa karik la to’o, Governu no parte hotu esforsu atu hasa’e kresimentu ekonomia iha nasaun ne’e.
“Banku Mundiál nota katak kresimentu ekonomia iha Timor-Leste la’o hela, maibé ami preokupa oituan kona-ba tasa kresimentu ne’ebé ladún sufisiente, entaun Governu no entidade hotu tenke buka meiu atu bele hasa’e kresimentu ekonomia atu bele hasoru dezafiu ba dezempregu ne’ebé akontese agora daudaun”, nia haklaken.
Tuir observasaun Banku Mundiál nian katak investimentu hosi setór privadu iha Timor-Leste seidauk másimu, tanba ne’e Governu tenke buka dalan atu bele koopera hamutuk ho setór privadu hodi dudu ekonomia Timor-Leste di’ak liután ba oin, atu bele hamenus dezempregu.
Jornalista: Hortencio Sanchez
Editór : Zezito Silva
