COVALIMA, 12 outubru 2023 (TATOLI) – Tratór iha sentru Sanfuk avaria, nune’e agrikultura sira iha Covalima kontribui osan hodi sosa bateria tratór nian nune’e bele fila sira-nian rai.
Xefe Brigada Sentru Tratór Sanfuk Covalima, Tomás Amaral, hatete sentru ne’e hasoru difikuldade tanba tratór avaria, maibé agrikultór sira kontribui osan hodi sosa bateria tolu ne’ebé kada ho folin $160.
“Tratór para hotu iha sentru tratór Sanfuk, maibé tratór avaria nune’e ami uza meiu forma grupu agrikultór tolu kontribui osan sosa aki tratór tolu, nune’e ami bele fila agrikultór nia rai”, Tomás Amaral, iha Sanfuk Camnasa.
Tuir dadus, tratór iha sentru Sanfuk hamutuk 30, husi númeru ne’e 17 halo atendementu fila agrikultór sira-nian rai, lima lelaun ona no seluk avaria no seidauk halo manutensaun.
Ba tratór ne’ebé aat sentru hato’o ona pedidu ba Ministériu Agrikultura atu halo manutensaun, maibe laiha rezultadu hodi haruka ekipamentu husi nasionál mai munisípiu.
“Ami hili opsaun hodi deside hamutuk ho agrikultór sira kontribui osan hodi sosa aki tratór tolu hodi halo atendementu ba grupu tolu ne’ebé kontribui osan. Hafoin finaliza fila grupu tolu nia to’os kontinua ajuda fila agrikultór sira seluk nia rai ne’ebe hato’o pedidu ba sentru”, dehan.
Aleinde kontribui osan sosa bateria, agrikultór sira mós tenke sosa mina rasik depende to’os nia medida hafoin tékniku sira halo kálkulu ba uzu mina atu fila rai. Bainhira agrikultór nia rai ektare ida entaun presiza kombustivél litru 30, se medida 100×50 litru 20 no medida 10×50 litru 10.
Iha epóka 2023, entre agostu no outubru ne’e , sentru halo ona atendimentu fila agrikultór 197 nia rai hamutuk ektare 145.99.
Jornalista: Celestina Teles
Editora: Maria Auxiliadora
