BOBONARO, 12 outubru 2023 (TATOLI) – Governu liuhosi Sentru Lojístika Nasionál (CLN, sigla portugés), iha sábadu loron 14 fulan ne’e sei lansa fa’an foos lokál kuantidade saka 2,000 iha munisípiu Bobonaro ho presu normál.
Ðiretora Finansa CLN, Florbela Monica de Araújo, esplika, tuir loloos atividade ne’e hala’o aban loron 13 fulan ne’e, maibé la konsege implementa no adia fali ho razaun tanba autoridade munisípiu, postu no lideransa komunitaria sira okupadu hela ba kandidatura eleisaun xefe suku.
Notísia relevante: Governu sei halo intervensaun foos importasaun iha semana oin
“Ita haree ba ho ninia toneladas 25 kilograma ita fa’an ho nia presu $12 no 35 kilograma ne’e ami fa’an ho $15, ami sei fa’an ho kuantidade saka 2,000 ou 50 tonelada,” nia informa ba jornalista sira iha armazein CLN Maliana, kinta ne’e.
Nia dehan, CLN foti asaun refere bazea ba orientasaun hosi IX Governu hodi halo intervensaun ba presu foos ne’ebé kuaze sa’e iha merkadu territóriu nasionál.
Diretora ne’e subliña, foos refere sei fa’an ba komunidade sira iha postu administrativu Atabae, Balibo, Cailaco, Bobonaro no Lolotoe, liuliu ba komunidade sira iha área remota.
“Ha’u hanoin kona-bá postu administrativu Maliana Vila, ami sei koordena ho autoridade munisípiu, ami sei hein orientasaun, karik iha Maliana presiza atu halo intervensaun, entaun ami prontu atu fa’an iha Maliana Vila,” nia katak.
Sekretáriu Autoridade Munisípiu Bobonaro, João de Fátima do Carmo, agradese ba Governu tanba bele halo intervensaun ba folin foos hodi bele hakmaan komunidade sira-nia preokupasaun.
“Ita sei halo lansamentu simbolikamente iha edifísiu autoridade munisípiu Bobonaro, depois mak aranka ba postu-postu, tanba ne’e mak ha’u husu komunidade sira, liuliu ba inan-aman sira ne’ebé presiza, hotu-hotu bele asesu, ne’e ita-nia foos rai fa’an ho folin baratu,” nia apela.
Tuir planu karreta unidade hitu komposta hosi kamioneta haat no fuju tolu sei transporta foos rai hirak-ne’e hosi Dili ba kapitál Maliana.
Notísia relevante: Foos 25 kilograma iha Omelai Molop sa’e ba $20
Jornalista: Sérgio da Cruz
Editór: Evaristo Soares Martins
