Governu hala’o inspesaun bá CLN Baucau
BAUCAU, 12 outubru 2023 (TATOLI) – Governu liuhosi Ministériu Komérsiu no Indústria (MKI) kinta ne’e, hala’o inspesaun ba Sentru Lojístiku Nasionál (CLN, sigla portugés) munisípiu Baucau relasiona ho implementasaun intervensaun foos iha merkadu.
Vise-Ministru Komérsiu, Augostu Junior Trindade, esplika, objetivu hosi vizita ne’e atu haree direita kondisaun inklui konsolida forsa hamutuk relasiona folin ho planu intervensaun foos iha merkadu.
“Solusaun hahú ona, ohin ita mai vizita iha ne’e parte ba buka solusaun. Ita hatene agora daudaun CLN halo intervensaun iha fatin hotu,” Vise Ministru Komérsiu hateten iha Vila Nova.
Governante ne’e, argumenta, urjénsia atu halo vizita ba CLN hotu iha munisípiu hodi hatene kapasidade armazeIn sira nune’e hatene ona fatin ne’ebé mak sufisiente atu rai hahaan hanesan hare inklui halo prosesamentu antes responde intervensaun iha merkadu.
MKI atuál sei iha faze preparasaun rekizitu bazea ba dekretu governu hodi responde ba folin foos sa’e iha merkadu inklui sei halo evaluasaun ba serbisu CLN nian iha terrenu tuir kapasidade estoke iha armazein.
“Presiza serbisu hamutuk entre liña ministeriál inklui ajênsia autónomo sira nune’e serbisu bele la’o di’ak,” Augostu Trindade akresenta.
Xefe armazein CLN munisípiu Baucau, Domingos Sarmento, agradese ba Vise ministru Komérsiu tanba vizita ona hodi haree direita kondisaun no halo koordenasaun kona-ba intervensaun foos ba komunidade Baucau.
“Bainhira ita pakote ona, konforme desizaun hosi superiór antes halo intervensaun foos ba merkadu,” Domingos Sarmento hateten.
Estoke hahaan iha CLN Baucau atuál komposta hosi foos hamutuk tonelada 207, koto tonelada 29 no foremungu tonelada 20-resin ne’ebé sosa hosi agrikultór rai-laran no distribui hosi kompañia responsável.
Jornalista : Natalino Belo
Editór : Evaristo Soares Martins
