VIQUEQUE, 12 outubru 2023 (TATOLI)-Diretór serbisu edukasaun munisípiu Viqueque, Domingos Brandão, informa Governu liuhusi Ministériu Edukasaun (ME) distribui ona kaderneta ba munisípiu Viqueque hamutuk 5.294-resin hodi aloka ba Ensinu Báziku no Ensinu Sekundáriu Jerál.
“Foin lalais ami haruka proposta ba Ministériu Edukasaun nune’e iha semana kotuk distribui kaderneta hamutuk 5.809 atu distribui ba ensinu báziku no sekundáriu sira-ne’ebé iha munisípiu Viqueque”, Domingos Brandão, hateten ba Agência Tatoli, iha edifísiu edukasaun Viqueque, Beloi, kinta ne’e.
Domingos hatutan, serbisu edukasaun munisípiu Viqueque orienta ona parte lojistítika no armazén atu halo identifikasaun ba eskola sira-ne’ebé seidauk iha kaderneta ba ensinu báziku no sekundáriu jerál.
“Agora dadaun ne’e ha’u orienta ona sira lojístaka no armazenamentu hodi halo identifikasaun ba eskola ensinu báziku no sekundáriu jerál sira iha Viqueque ne’ebé maka seidauk hetan kaderneta. Bainhira halo hotu ona identifiaksaun ami hahú distribui ba eskola sira”, nia hato’o.
Ho kaderneta ne’e, nia dehan, kaderneta ba sekundaáriu sente sufisente ona, maibé ba ensinu báziku presiza aumeta tanba kaderneta ne’ebé daudaun distribui mai Viqueque ne’e la sufisiente.
“Ha’u sente kaderneta ba sekundáriu sira nian ne’e sufisente ona, maibé kaderneta ba ensinu báziku maka seidauk sufisiente tanba ensinu báziku ne’e kompostu husi sentrál no filiál estudante númeru bo’ot. Tan ne’e, ha’u hanoin Ministériu presiza distribui tan kaderneta ba ensinu báziku nian mai munisípiu Viqueque,” nia akresenta.
Tuir dadús kaderneta ba ensinu báziku husi primeiru siklu no segundu siklu kaderneta hamutuk 1.400 no kaderneta ba sekundáriu jerál ba primeiru anu no segundu anu hamutuk 4.409 dadaun ne’e iha armazé serbisu edukasaun Viqueque.
Jornalista: Vitorino Lopes da Costa
Editóra : Julia Chatarina
