BAUCAU, 12 outubru 2023 (TATOLI) – Serbisu Munisipál Sekretariadu Tékniku Administrasaun Eleitorál (STAE) Baucau tuir planu sei aluga tán karreta hamutuk 50 hodi distribui materiál eleisaun suku ba sentru votasaun hotu.
Diretór STAE munisípiu Baucau, Natividade Freitas, esplika, hafoin remata halo pakotementu materiál eleisaun sei transporta iha loron-27 outubru ba sentru votasaun hotu iha munisípiu Baucau.
“Ita sei presiza tán karreta hamutuk 50 inklui sei apoia tán hosi governu,” Diretór STAE Baucau hateten iha Vila Nova, kinta ne’e.
Tuir kalkulasaun STAE Baucau kada suku sei presiza transporte hodi distribui materiál hamutuk tolu nune’e tuir planu sei presiza kareta hamutuk 140 maibé sei bazea ba kondisaun iha terrenu.
Maske nune’e, STAE Baucau sei prepara planu bainhira transporte la sufisiente hanesan sei distribui uluk materiál eleisaun ba sentru votasaun ne’ebé kategoria dook loron-rua antes realizasaun eleisaun iha loron-26 outubru.
“Ami sei koloka hela, bainhira transporte la sufisiente, ami sei distribui uluk materiál balun ba sentru votasaun ne’ebé konsidera dook,” Natividade Freitas akresenta.
Totál eleitór iha eleisaun suku tinan-ne’e hamutuk rihun 90-resin hosi totál sentru votasaun 281 iha suku 59 no postu administrativu neen iha munisípiu Baucau.
Jornalista : Natalino Belo
Editór : Evaristo Soares Martins
