STAE Baucau simu ona urna 1.139
BAUCAU, 12 outubru 2023 (TATOLI) – Sekretariadu Tékniku Administrasaun Eleitóral (SATE) munisípiu Baucau, simu ona urna 1.139 hodi utiliza ba elisaun suku iha tinan-ne’e.
Diretór STAE munisípiu Baucau, Natividade Freitas, esplika, urna hirak-ne’e transporta ona hosi nasionál iha semana kotuk no tuir planu sei kontinua ba sentru votasaun hotu iha munisípiu Baucau relasiona ho realizasaun eleisaun suku.
“Ita-nia urna iha-ne’e ona, hein tán ekipamentu seluk hodi kompleta atu transporta ba kada sentru votasaun,” Diretór STAE Munisípiu Baucau hateten iha Vila Nova, kinta ne’e.
STAE mos simu ekipamentu seluk hanesan goma, formuláriu eleitór, formuláriu lista kandidatura xefe suku no entrega ona ekipamentu relozu, akta, formuláriu ba konsellu suku sira hodi uza bainhira rejistu kandidatura xefe suku.
Ekipamentu ne’ebé seidauk transporta hosi nasionál hanesan buletin xefi aldeia no delegadu mak sasán ba asemblea aldeia tanba sei prepara no tuir planu sei too antes realizasaun eleisaun.
“Ekipamentu seidauk kompleta, sei hein lista mai mak konfere depois halo pakotementu,” Natividade Freitas akresenta.
Kona-ba preparasaun estabelese meza asemblea suku distribui ona ba kada suku no finaliza ona inklui hein atu implementa iha aban loron-sesta, 13 outubru.
Prosesu resensiamentu eleitóral kontinua halao tuir kada postu administrativu tanba eleisaun suku diferensa ho eleisaun parlamentár no prezidensiál ne’ebé tenke atualiza iha loron-30 antes realizasaun eleisaun.
Totál eleitór iha eleisaun suku tinan-ne’e hamutuk rihun 90-resin hosi totál sentru vitasaun 281 iha suku 59 no postu administrativu neen iha munisípiu Baucau.
Jornalista : Natalino Belo
Editór : Evaristo Soares Martins
